Nagbusyad nga tiyan

Husto bitaw nga ang mga traffic enforcers angay’ng dili gayud magpadagko sa ilang tiyan aron dili sila hinganlan og mga “buaya” sa karsada.

Sama gud sa panahon ni kanhi PNP Chief Panfilo Lacson nga taktakon g’yud kadto’ng mga polis nga ang tiyan subra sa 34 ang gidak-on. Apan karon, mibalik ang mga polis nga nagpabusyad na lang ‘sab sa ilang mga tiyan.

Bitaw, pabor si Lacson kaniadto kay gamay man ‘sab kaayo’g tiyan. Si Mayor Michael Rama ‘sab nga maoy mimando nga ipagamay ang mga tiyan sa CITOM enforcers, dili man ‘sab dako’g tiyan.

Law-ay bitaw kaayo tan-awon nga dako’g tiyan ang mga road law enforcer. Usa sa sekreto pagpagamay sa tiyan gawas sa exercise, menosan ang kaon, wala nay beer.

Si LTO-7 Regional Director Arnel Tancinco pabor kaayo nga estriktohon ang pag-require sa mga traffic enforcer nga ipagamay ang ilang mga tiyan.

Husto tuod, kon dako ang tiyan sa mga traffic enforcer, dili sila makalahutay pagbarog diha sa karsada aron mapatunhay nila ang dagan sa mga sakyanan.

Mao kana ang rason nga adunay ubang traffic enforcers nga makit-an nimo nga molingkod ug mopahuway sa aseras bisan og traffic kaayo ang eskena nga diin siya madestino.

* * *

Nagtuo ko nga pipila ka adlaw gikan karon, dunay mga drug pushers diha sa Bohol nga manghay-ad. Sigurado nga ang kapolisan mobawos sa pagpatay sa ilang kauban didto sa Tagbilaran City, Bohol kaniadto’ng Biyernes.

Aw, tan-awa kadto’ng pagpatay sa hepe sa kapolisan sa Ubay, Bohol, ang bawos nanghay-ad ang unom ka drug pushers nga responsable  sa kamatayon sa opisyal.

Abi ninyo, ang mga sindikato sa ilegal nga drugas karon armado na og high-powered nga mga armas ug usa kini sa rason nga ang mga tawo mahadlok nga moabag sa kampanya.

Nalimot mo nga diha’ng napatay sa kapolisan kadto’ng drug pusher sa Bohol ug nadakpan ang pipila nila ka kauban, daghang high powered nga armas ang nasakmit?

Ingon usab niana ang sitwasyon dinhi sa dakbayan. Nagtuo mo nga ang mga armado nga drug pushers tua ra sa Bohol? Ang mga drug pusher dinhi sa dakbayan sa Sugbo daghan ‘sab og mga armas.

Diha sa Talisay, nakadawat ko og inpormasyon gikan sa akong inpormer sa kalihukan sa usa ka tigpayuhot og gidili nga drugas nga matud pa giprotehean pa og polis.

Nangutana ko sa kauban nako nga reporter kon nakaila ba siya sa polis nga gitug-an sa akong inpormer. Ang akong kauban igo lang mikatawa nga nagpasabot nga nasayod siya.