Unsaon pagsuta kon duna bay warrant?

Dear Atty. Divine,

Duna ko’y pangutana may labot sa kaso sa akong ig-agaw human siya nalambigit sa pagpatay sa tawo nga mikulata kaniya. Actually, dili g’yud siya ang nagpusil sa biktima kondili ang iyang igsuon apan nagkuyog sila niadtong higayona ug ang iyang igsuon igo lang milaban kaniya mao nga human sa hitabo milayas sila’ng duha. Hangtod karon wa na g’yud sila mopauli sa ilang lugar hinungdan nga wa na sab nila maduaw ang ilang pamilya. Ang akong pangutana attorney kon automatic ba nga mahimong wanted ang magsuon nga duna may nakakita nga ang maguwang ra ang nagpusil? Mahimo ba sila’ng dakpon bisan kon wa sila makatubag sa ilang kaso? Unsaon man namo pagsuta kon aduna ba g’yud sila’y pending nga warrant of arrest? Kon way warrant mahimo ba silang dakpon kon mouli sila? - Lucelle

Dear Lucelle,

Kon adunay nakasaksi sa maong hitabo possible g’yud silang napasakaan og kaso ug kon atol sa imbestigasyon masuta sa fiscaliya nga adunay lig-ong basehan hayan nasang-at g’yud ang maong kaso sa korte bisan kon wa pa sila makatubag niini. Kon napasaka ang kaso sa korte, posible nga aduna sila’y pending nga warrant of arrest karon sa korte. Bisan kon ang maguwang ra ang nagpusil posible nga gilakip sa pagpasaka og kaso’ng murder ang manghod ilabi na kay sila ang nagka-engkwentro. Ang maayo ninyo’ng buhaton karon aron inyong mahibaw-an kon aduna ba g’yuy pending nga warrant of arrest ang imong ig-agaw mao ang pagsusi sa korte diin nahitabo kining maong krimen. Laing paagi nga inyong mahibaw-an kon asa nga korte nabutang ang ilang kaso mao ang pagpangayo og Court Clearance sa lugar diin nahitaboan gamit sa pangan sa imong duha ka ig-agaw kay mogawas man na ngadto kon aduna sila’y pending  nga kaso. Kon inyo nang mahibaw-an asa nga korte, mamahimo na kamo nga mosusi kon unsay status sa ilang kaso. Apan kon wa sila’y warrant unya mopauli sila, dakpon lang sila kon mapasakaan na sila’g kaso ug aduna nay ipagawas nga warrant of arrest batok kanila. Hinaut nga akong natubag ang imong mga pangutana. Thanks and God Bless. - Atty. Divine