Wala kaha’y mobabag?

Gimando ni Regional Director Carmelita Dulangon sa Department of Education (DepEd)-7 nga ipaputol ang tanang dagko’ng kahoy sulod sa compound sa mga public elementary ug high schools sa Central Visayas.

Kini aron paglikay nga may madisgrasya nga mga bata sa higayon nga mabali ang mga sanga o kaha matumba ang hain mang punoan  sa maong mga kahoy.

Nakasinati man gud si Ma’am Dulangon nga dunay bata nga natagakan og sanga sa kahoy didto sa usa ka tunghaan sa Talisay City diha nga siya pay district superintendent didto. Nalaksi ang sanga sa kahoy ug didto mapunta sa mga bata.

Kumo kay kasinatian na kini niya, dili na gusto si Director Dulangon nga mahitabo pa kini pag-usab sa bisan asa nga eskuylahan sa rehiyon 7.

Busa gisugo na niya ang mga principal nga mananghid ug mokuha og cutting permit gikan sa Department of Environment and Natural Resources (DENR)-7 aron kasugdan na ang pagpamutol sa mga kahoy nga dagko ug karaan na.

Hinuon, gituohan nga supakon na usab sa mga environmentalist kining tinguha ni Director Dulangon ug moreklamo na usab sila ngadto kang DENR Secretary Ramon Paje.

Kumo kay mora’g miyukbo man kaayo si Paje ngadto sa mga environmentalist, aw natural hayan babagan na usab unya ang tinguha sa regional director sa DepEd.

Ang Espada nga nagpaniid niini, igo lang moingon nga dili molampos ang gilaraw ni Director Dulangon ug maayo pa nga ibalhin ang mga eskuylahan ngadto sa mga dagko’ng hawan kay sa magpabilin sila sa lugar nga namilegro ang kinabuhi sa mga bata nga matumbahan sa mga kahoy. ([email protected])