Masterplan: Ugma sa SRP

Matag local chief executive sa usa ka lokal nga kagamhanan adunay kaugalingong mga pamaagi pagpadagan sa iyang lungsod o siyudad nga gidumala. Apan kung kinsay husto magdepende kun unsay malantawan nga moresulta sa ilang desisyon.

Mao kini ang isyu karon: kinsay husto nilang kanhi mayor Tomas Osmeña ug ni Mayor Michael Rama sa pamaagi pagbaligya sa mga luna sa South Road Properties?

Sa report sa The Freeman kagahapon, si Tomas mikuwestiyon sa authority nga gihatag sa Konseho ngadto kang Mike pinaagi sa resolusyon kay matud niya dili kini maka-amendar sa Build-Operate-Transfer (BOT) Law.

Sa ato pa, buot ni Tomas nga hangpon sa siyudad ang BOT isip pamaagi pag-dispose sa mga luna sa SRP.

Ang Konseho mihatag og gahum kang Mike pagbaligya sa mga luna sa SRP pinaagi sa subasta.

Ang BOT usa ka kontraktuwal nga kasabutan tali sa usa ka sanga sa gobyerno o lokal nga kagamhanan ug pribadong indibidwal o korporasyon diin ang naulahi maoy mopabarog (apil na ang paggasto) og inprastraktura, ug kun mobarog na dumalahon kini sa nagpabarog sulod sa katuigan depende sa masabutan. Ini’g ka-pupos sa nasabutan nga gidugayon, maangkon na sa tag-iya sa luna ang gipabarog nga inprastraktura o edipisyo.

Sa laing bahin, ang subasta kun public bidding usa ka pamaagi diin ang lokal nga kagamhanan modawat og aplikasyon sa mga interesadong tawo o korporasyon nga buot moangkon og propriedad sa SRP. Ning paagiha, maangkon sa nakapalit ang luna kun ma-consolidate niini ang kapanag-iyahan.

Para ninyo unsay maayo, ibaligya pinaagi sa subasta ang mga luna sa SRP o ipaagi sa BOT?

Apan taym pa ra gud, kon ang BOT maoy naa sa hunahuna ni Tomas, nganong wala niya kini buhata sa dihang siya pa ang mayor?

Ayaw ko og ingna nga karon ra siya nakahunahuna niini nga dili na siya ang mayor? Kay kun mao kini, maayong magpabilin na lang siyang sibilyan kay makahunahuna man siya og maayo alang sa siyudad.

Kanang atong problema sa baha kaniadto pa nga giantos sa mga Sugboanon sa panahon ni Tomas isip mayor, apan wala gyud siyay nahunahunaan nga alibyo. Ambot kaha karon, basin duna na siyay nahunahunaan nga dili na siya ang mayor.

Sa dihang si Tomas pa ang mayor, nakig-joint venture ang siyudad tali sa Filinvest. Kini maoy maayong itambag ni Tomas kang Mike.

Bisan BOT o joint-venture pa o public bidding ang pag-dispose sa mga luna sa SRP, dili mahulma ang nindot nga kaugmaon sa SRP kun walay masterplan.