EDITORYAL - Honoraryom ra’y giapas

Mga opisyal sa kabarangayan dinhi sa dakbayan sa Sugbo mapahiyumon kaayo nga mikobra sa ilang dugang binuwan nga honoraryom gikan sa City Hall kaniadto’ng Lunes.

Ang P15 mil nga gikobra sa mga kapitan sa barangay, P9 mil sa mga konsehal ug P6 mil sa mga secretary ug treasurer sa barangay, maoy ilang  dugang honoraryom sa buwan sa Abril, Mayo ug Hunyo. Gawas sa dagko na nga binuwang honoraryom gikan sa masi’g nila ka barangay, sila nga mga opisyal sa kabarangayan magdawat pa og dugang honoraryom gikan sa City Hall.

Pagdasig kini sa mao nga mga opisyal aron moserbisyo sila pag-ayo ug abagan nila ang mga opisyal sa City Hall pag-asikaso sa mga angay’ng hatagan og pagtagad diha sa tagsa-tagsa nila ka barangay.

Apan ila ba gud nga gihimo ang gitahas kanila? Daghan sa mga opisyal sa barangay nga abtik kaayo nga mikobra sa ilang honoraryom apan wala magtagad sa problema sa ilang mga dapit.

Mga suga sa poste nga wala na mosiga ug mga kanal nga miawas ang tubig sa karsada gipasagdan lang nila. Wala gani sila maka-report ngadto sa kadagkoan sa City Hall aron unta ang problema maatiman.

Apan may panahon pa nga kining mao nga mga opisyal sa kabarangayan mag-usab gikan sa ilang pagkatapolan ug moserbisyo na sa katawhan. Ang pagserbisyo sa katawhan wala magpasabot nga kinahanglang malipay ang tanan.

Sama pananglit sa pagbadlong sa mga motorista nga moparada sa ilang mga sakyanan daplin sa mga karsada. Sa ingon nga paagi nakatabang na sila sa gimbuhaton sa City Hall diha sa tagsa-tagsa nila ka dapit.