Mga lagda sa kaligdong
Sa usa sa iyang pagduaw sa Sugbo pipila ka tuig sa wa pa siya motaliwan, si anhing Kalihim Jesse Robredo sa Department of Interior and Local Government (DILG) nipalili sa labing yanong mga detalye sa iyang pakigbisog batok sa tradisyonal nga pamolitika ug madanihong mga tentasyon sa pangurakot.
Sa pagtimaan sa unang sumad sa iyang kamatayon, gihinumdoman ang iyang tsinelas leadership, pag-insistir nga mag-bus inay nga mag-ayroplano o mag-awto gikan ug padung sa Naga City ug Metro Manila ug ligdong ug kugihang liderato. Apan giunsa man pagpanalipod ni Robredo ang iyang kaugalingon gikan sa mananakod nga mga kagaw sa pangurakot sa kasarangang mga higayon nga way nagtan-aw ni nagbantay sa iyang mga lakang?
* * *
Pagsugod pa lang sa iyang labing unang termino pagka mayor sa Naga City, giumol dayong Robredo ang yano apan lisod ipatuman nga mga lagda:
Sama sa ubang mga politiko, mosugot siya nga mangugos og bunyag ug mangluhod og kasal sa mga molupyo sa iyang dakbayan; apan
Lahi sa ubang mga politiko, gisabot niyang daan ang mga ginikanan sa mga bunyagan ug ang mga kaslunon ug ilang kaparyentihan nga di siya mohatag nila og bisan unsang regalo ni bisan unsang pabor nga lapas sa balaod ug sa mga lagda sa kaangayan.
* * *
Niangkon si Robredo nga naglisod siya pagkumbinser sa mga molupyo nganong higpit niyang gipatuman ang lagda. May namasangil niya nga nasobrahan katihik. Mas daghan ang nitulisok niya nga nagpaka-santo ug naghilas-hilas. Mas daghan pa gyud ang nagduda nga laing baratuhon nga politikanhong salida lang ang iyang gipasiugdahan.
Apan sa kapulihay ug salamat sa mapailubon niyang pagpasabot nakumbinser ra niya ang katawhan nga ang di paghatag og mga regalo samtang gamay ra tinuod nga tan-awon apan dako na kaayo og ikatampo aron nga ang gamay niyang suhol ug mga benepisyo isip mayor makatubag na sa batakang mga panginahanglan sa mga sakop sa iyang pamilya.
* * *
Laing lagda nga gihuptan ni Robredo ug determinado niyang gipatuman sa kinatibuk-an sa iyang mga termino hangtod na gani sa pagkatudlo niya sa gabinete mao ang pagtino nga magpabiling baratuhon ang iyang mga sapot. Matag higayon nga mag-ilis siya ug makitang maghuot nang iyang kabinet ug may pipila na ka nangasaag nga mahalong mga sapot, sukmatan ang iyang kaugalingon nga inanay nang nakalimot sa iyang panumpa pagpuyo sa labing yano nga kinabuhi.
Lisod puy-an ang kaligdong. Lisod suklan ang mga tentasyon sa gahom. Mao ni gisilsil ni Robredo sa iyang panghunahuna sa wa pa mangahas pagpaila sa iyang kaugalingon nga alternatibo sa nanggungis na nga politikanhong dinastiya sa Naga. Maong nag-umol siya og mga lagda nga nigiya niya bisan sa labing laay ug kasarangan nga mga aspeto sa kinabuhi.
- Latest
