Dako’ng bugalbugal

Uyon ba kamo nga lugwayan pa ang termino ni Presidente Benigno Aquino? Siguro kadto’ng mga misuporta kaniya sa 2010 presidential election mohangop gayod niini nga lakang.

Sa niagi nga mga adlaw, mibutho ang isyu mahitungod sa panawagan nga angay kuno nga lugwayan pa ang termino ni Aquino. Kini nunot kuno sa maayo niya’ng performance sa iya nga pagkupot sa renda sa pangagamhanan.

Matud pa sa mga suporter ni Aquino, misulbong pag-ayo ang ekonomiya sa Pilipinas ilalum sa iyang administrasyon. Ug angay lamang kuno nga magpadayon pa kini’ng mao’ng kalamboan.

Hinuon, dili nato ikalimod nga miarangkada na ang ekonomiya sa nasud niini’ng nakalabay nga mga tuig. Ug klaro usab nga resulta kini sa gipatuman nga mga programa sa kasamtangan nga administrayon.

Apan nunot niini’ng paglambo sa atong nasud karon, angay ba usab nga magpadayon ang termino ni Aquino aron usab nga mapadayon niya ang mga programa alang sa duga’ng kalamboan?    

Kun ang Konstitusyon maoy ato’ng basihan, imposible gayud nga malugwayan pa ang termino sa presidente. Klaro’ng gilatid niini nga usa lamang ka termino, nga adunay unom ka tuig, ang serbisyohan sa presidente ug bise presidente.

Apan ngano’ng ipamugos pa man sa mga batos ni Presidente Aquino ang iya’ng pagpadayon sa katungdanan? Kini aron ba nga makapadayon usab ang ila’ng pagpahimulos sa poder?

Bitaw, makaduda ang intensiyon niini’ng pagduso sa isyu paglugway pa sa termino ni Aquino. Kini tungod kay klaro’ng personal nga interes ang tumong niini’ng pipila kinsa nagsige og tila sa presidente.

Hinuon, sigurado’ng mogimok na usab ang mga alalay sa presidente sa Kongreso aron nga matuman kini’ng mao’ng lakang. Ug karo’ng pipila ka adlaw, bibo na usab ang kinamangay alang sa lakang pag-overhaul sa ato’ng Batakang Balaud.

Apan ang mao’ng lakang dako’ng pagbugalbugal na usab sa ato’ng Konstitusyon. Tiaw mo na’ng gusto nila’ng ihawon ang Batakang Balaud aron lamang ma-satisfy ang ila’ng ka hakog sa gahum.

Nunot niini’ng nagkadaiya’ng anomaliya nga naglikos sa rehimen ni Aquino, nakaako uroy kini’ng iya’ng mga gaway pagduso sa lakang pag-usab sa Konstitusyon. Daghan hinuon ang nakatimaho nga lingla lamang kini aron pagsimang sa atensiyon sa katawhan.