EDITORYAL - Way kahadlok nga si Palparan

Ang kaso sa retiradong heneral sa Philippine Army nga si Major. Gen. Jovito Palparan usa sa labing gitutokan og maayo dili lang sa mga gobiyerno ug iyang mga supporters, kondili, lakip na ang New Peoples Army nga nagdumot kaniya.

Dili gradwado si Palparan sa prestihiyosong Philippine Military Academy (PMA), produkto siya sa Reserve Officers Training Corps (ROTC). Ang karera ni Palparan isip usa ka sundalo, lisod ug puno sa kontrobersiya. Diha siya nakabaton og mga kaaway di lang sa mga rebelde kondili bisan na mismo sa sud sa gobiyerno nga iyang naligsan.

Si Palparan gidakop kay suspek siya sa pagkahanaw sa duha ka mga babayeng estudyante sa University of the Philippines sukad pa niadtong tuig 2006 ug uban pang supporters ug opisyal sa NPA sa mga lugar kun asa siya madestino. Mga pasangil nga tanan iyang gihimakak.

Tungod sa ngilngig kaayo niya nga mga pamaagi gianggaan siyang “The Butcher.”

Nahimo pa siyang “bayani” niadtong 2003-2004 didto sa Iraq dihang siya ug mga sundalong Filipino milusad og rescue operation ug naluwas ang napulo ka Filipino truck drivers nga gisignit sa militanteng Iraqis bisan sa pagsupak sa mga Amerkano, milampos si Palparan.

Ang ika-onse unta nga Filipino driver nga si Angel dela Cruz gihimong paon sa Iraqis aron papaulion ang tanang tropang Filipino. Si dela Cruz gibuhian human namauli sa Pilipinas ang mga Filipino.

Sa uwahing mga adlaw sa wa pa siya madakpi,  subling gipakita sa 64-anyos na ug hinay na ang panglawas nga heneral ang iyang pagka “daring,”  diha nadakpan sa kanhi safehouse sa mga NPA, sa lugar nga gipalibotan og mga supporters sa mga rebelde? Usa ray gikahadlokan sa heneral, sama sa ubang mga sundalo, ang safety sa iyang pamilya. Karon hangtud di mapamatud-an sa pasangil kaniya, angay isipon nga inosente si Palparan.