Kinsa ang may sala

Gibasol sa 14-anyos nga babaye ang iyang inahan diha’ng nadakpan siya sa mga polis nga nagbaligya og ginadili’ng drugas nga mobalor og P5.9 milyones. Ang dalagita mitug-an nga nanginahanglan ra unta siya og gugma ug pagpangga sa iyang inahan, pero iwakli ra man siya.

 Ang inahan sa dalagita nag-inusara nga mikayod aron sila mabuhi pinaagi sa pagpanglabada ug pagbantay sa anak sa uban. Apan inay kay tabangan sa anak ang iyang mama, siya gilayasan man hinuon ug sa dihang iyang nakit-an diha na kini sa prisohan.

 Karon, kinsa man ang mabasol sa ilang gidangatan? Ang inahan ba nga gipasanginlan sa anak nga nagkuwang sa iyang pagmahal ngadto kaniya o siya nga anak nga imbes kay motabang ug moayuda sa iyang inahan nga nag-inusara nga mikayud aron sila mabuhi, iya na hinuon kining gilayasan?

 Tungod sa paghimo sa mga sindikato sa ginadili’ng drugas sa menor de-edad nga maoy ilang tigbaligya nabanhaw na usab karon ang panawagan nga usbon ang Juvenile Law nga nagpataas sa edad niadto’ng mga dili mapasakaan og kaso nga kriminal.

 Gibasol sa mga wala makauyon sa Juvenile law ang amahan sa mao nga balaod nga si kanhi Senador Kiko Pangilinan apan siya ra ba ang atong mabasol?

Ang Juvenile law gipalabang sa kongreso ug gipirmahan ni Pangulong Gloria Macapagal-Arroyo busa silang tanan ang angay’ng basulon dili kay si Kiko lang.