Tawo o kahoy?

Unsa ma’y imong palabihon, ang mga gabok na nga kahoy’ng acacia o ang kinabuhi sa mga tawo nga mahimong makalas kun matumbahan?

Kun ang imong tubag kahoy maoy imong palabihon tingali wala ka na sa maayo’ng panghuna-huna. Kadto’ng mga tawo nga nangatkat sa kahoy kay dili nila gusto nga ipaputol, maayo unta og maleksyon sila sa umaabot nga mga adlaw.

Dili na lang nako idetalyi kun unsa nga paagi nga sila maleksyon. Tiaw mo, bisan si Monsenyor Esteban Binghay diriyot man gani matumbahe sa kahoy pag-agi niya sa San Fernando pipila ka semana ang milabay.

Walay pilion kun ang kahoy matumba na. Matud sa pari nga ang iyang gisakyan ikatulo nga sakyanan gikan niadto’ng trak nga natumbahan sa kahoy.

Aw kadto lagi nga PUJ nga miagi lang tungod sa Zapatera Elementary School sa dalan Sikatuna mga duha ka tuig na ang milabay, maayo’ng pagkapusa sa drayber diha nga natumbahan sa dakong punoan sa acacia.

Maghuwat pa ba kita nga adunay laing kinabuhi nga makalas? Unya mangatkat pa g’yud mo’s kahoy aron dili dayonon pagputol? Ang nindot unta kun wala lang g’yud sila magpahibalo aron madungan sila pagkahagsa sa ubos.

* * *

Dunay tag-iya’g motor nga nangutana kanako kaniadto’ng miagi’ng adlaw kun gidayon ba sa pagpatuman ang mga lagda sa Joint Administrative Order 2014-01.

Maayo kay mituman gayud ang mao nga drayber, gipangilisan niya ang bahin sa iyang motor nga nahasupak base sa lagda. Apan baya kini’ng ubang drayber.

Kagahapon, may nasundan ko nga motor paingon sa Busay. Susama sa gipanggamit sa SWAT apan walay plate number sa luyo. Paghunong, akong gitan-aw, ang plate number diha diay sa kilid gibutang.

Nakaingon ko nga pastilan, kun LTO agent pa ko, gisakmitan ko na’g lisensya ang maong drayber. Walay rason ang maong tawo nga adto sa kilid ug sa ubos nga bahin sa motor ibutang ang plate numbers kay may butanganan niini sa luyo.

Pastilan, ngano kaha nga wala man molihok ang mga sakop sa LTO Operations Branch nga gipangulohan ni Joel Maloloy-on aron pangsakmiton ang lisensya sa mga badlungon? Unsa, malooy ka nila Joel?

Angay g’yud unta nga ang LTO mohimo kanunay og operation aron mahadlok na ang mga motorista nga masinupakon sa balaod. Mag-unsa man nga aduna ta’y balaod nga dagko ang silot apan dili ipatuman? Maayo pa og       wala.

Palihug, Sir Arnel Tancinco, isip ikaw man maoy labaw sa mga opisyal sa LTO dinhi sa Central Visayas, palihoka na ang imong mga sakop.