Kahoy’ng nangatumba para sa kinabag-an

Nangunay sa pagpamutol sa mga karaang kahoy sa South National Highway gikan sa Naga paingon sa Carcar ang Department of Environment and Natural Resources (DENR) tungod sa nakita niini nga hulga sa seguridad sa mga motorista ug sa mga residente sa maong lugar.

Kining mga kahoya karaan na gyud kaayo nga kinahanglan nang pamutlon. Hinaot nga ning puntoha, ang mga environmentalista makasabot sa tinguha sa gobyerno – nga mao ang pagsakripisyo sa kinaiyahan aron lang maluwas ang kinabag-ang katawhan. Tungod kini sa kadaghan nang insidente nga mikalas og mga kinabuhi ug midaot og kabtangan tungod kay natumbahan sa acacia, buli, ug uban pang karaang punoan sa kahoy.

Ang nahimutangan niining mga kahoya dili na haum alang kanila. Kun gusto kitang adunay sama niining mga kahoy, angay kining adto ibutang sa kalasangan – kalasangan nga wala’y tawo nga maka-abuso. Aduna pa ba kita niini dinhi sa Sugbo?

Sama sa nahitabo sa bukid sa Jampang sa lungsod sa Argao diin ang mga tawo hilabihan ka sakripisyo tungod kay gidid-an sa DENR pinaagi ni Regional Director Isabelo Montejo ang pagbukas sa karsada kay lagi mapung-ol man ang kakahoyan.

Kun ang pagputol sa kahoy moresulta sa kasayon sa katawhan pinaagi sa karsada nga ilang kaagian, nganong dili man kini mahimo kun ilisan lang og tanom nga mas daghan pa kaysa gipamutol?

Didto sa Bicol, ang DENR mihatag og pagtugot sa lokal nga kagamhanan nga pamutlon ang mga kahoy aron mapalapdan ang karsada.  Kun mahimo didto sa Bicol, nganong dili man sa Argao?

Adunay 5,000 metro kuwadrado nga mangrove area sa Barangay Tomonoy, Moalboal nga gipangbungkal ug gi-reclaim aron pabarogan og dakong tindahan, apan nganong gitugotan man kini sa DENR?                         Usa ka dokumento nga naabot sa akong lamesa nga gipirmahan sa usa ka Vip Fortich Semilla nga adunay litrato sa site development diin aduna pay 10 ka tiil nga gitas-ong punoan sa bakhaw ug nipa nga nagbarog.

Si Montejo nga taga-Argao dali kaayong makapakgang sa mga proyekto sa Argao, bisan kini alang man sa katawhan sa iyang lungsod nga natawhan. Apan kining mga kahoya nga pamutlon mahimo ra nga ilisan pinaagi sa “tree planting nga adto na sa kabukiran nga layo-layo na sa katawhan.