EDITORYAL - Kutob ra sa panghulga

Sa paglingkod ni Mayor Michael Rama sa iyang pwesto kaniadtong 2010, iya dayon nga gipahibalo ang usa sa iyang mga programa nga mao ang paghawan sa kasapaan.

Gipasabot sa mayor nga panggub-on kadtong mga balay ug mga straktura nga gitukod sulod sa tres metros gikan sa tampi sa sapa. Gusto ni Mayor Rama nga ibalik ang naandan nga gilapdon sa sapa.

Naigking gud ang tagdumala sa mga dagko’ng tindahan sa downtown area kay mihulga ang kagamhanan sa dakbayan sa Sugbo nga mopasaka kini og kaso aron ipaguba ang ilang straktura nga milapas sa kasapaan.

Dako’ng tindahan sa dalan Colon gimarkahan na gud kun asa kutob ang gub-on ug apektado ang mga tres metros sa ilang balay-patigayon gikan sa gitawag og Parian Creek.

Apan napupos na lang ang una’ng termino ni Mayor Rama ug hapit na ‘sab mahuman ang ikaduha apan wala pa gani makapasaka og kaso ang City Hall batok sa mga mapahimuslanon nga migamit sa sapa sa ilang negosyo.

Kining sapa nga ania mag-agi ilawom sa mga tindahan sa downtown area mao g’yud ang makapalunop kun mobunok ang kusog nga uwan kay moawas man ang tubig.

Angay g’yud nga unahon unta kini pagtagad apan nabantayan nga kutob ra man sa sulti ang mga opisyal sa City Hall kay wala man gani sila mopasaka og kaso sa hukmanan.