Kudeta

Mitumaw na usab ang mga taho sa plano nga kudeta batok niini’ng administrasyon ni Presidente Benigno Aquino III. Mao kini ang gibutyag sa mga opisyal sa Magdalo ngadto sa media. 

Matud pa ni Senador Antonio Trillanes, pipila ka retired general sa administrasyon ni kanhi presidente Gloria Arroyo ang aduna kunoy plano karon alang sa pagpalagpot kang Aquino gikan sa puwesto. 

Solido kuno kini’ng mao’ng taho. Gani gikunpirma kini ni Magdalo partylist Representative Ashley Acedillo. Atong mahinumdoman nga ang Magdalo maoy grupo sa mga sundalo nga milusad og pakyas nga kudeta batok sa rehime’ng Arroyo kaniadto.

Apan kabahin sa mga retirado’ng heneral, walay kamatuoran ang mao’ng taho. Wala silay plano nga kudeta, matud pa sa usa ka heneral nga usa sa mga Armed Forces Chief of Staff ni Arroyo kaniadto.

Hinuon gihimakak sa kasamtanga’ng administrasyon kini’ng mga plano nga kudeta sa militar. Dili kuno kini tinuod ug walay basihan, matud pa ni presidential spokesman Edwin Lacierda.

Apan kun tinuod man ang mao’ng plano, dako’ng pangutana kun molampos ba ang kudeta batok niini’ng administrasyon. Basi sa dagan karon, mora’g solid pa gihapon ang Armed Forces sa gobiyerno ni Aquino.

Wala koy nakita’ng rason ngano nga molusad pa og kudeta ang ato’ng kasundalohan karon. Nasayod kita nga gihatagan na sila og dako’ng prayoridad niini’ng kasamtanga’ng administrasyon sama sa pagpatuman sa modernisasyon sa ila’ng mga ekipo.

Tinuod daghan og mga kapalpakan kini’ng ato’ng presidente karon. Kini sama sa iyang pagsungag sa Korte Suprema. Apan dili kana maoy rason nga mapalagpot siya sa katungdanan pinaagi sa military intervention.

Sama sa nanghitabo sa ubang kanasuran, usa lamang ang pildero niini’ng mga kudeta. Kini mao mismo ang imahe sa ato’ng nasud. Gani grabe ang pagkahagba sa atong ekonomiya niadto’ng mga kudeta sa grupo ni Senador Gregorio Honasan batok sa administrasyon ni Corazon Aquino.

Bisan kinsay pangutan-on, wala nay gusto nga maingon niadto’ng mga panahona ang ato’ng nasud. Grabe na ang paglambo sa Pilipinas gikan sa mga nanglabay’ng administrasyon hangtud karon.

 Ug, karo’ng mga panahona, dili na kita makatugot nga manghilabot pa ang militar sa dagan sa ato’ng pangagamhanan.