EDITORYAL - Sulu massacre sagpa sa PNP-AFP

Kahapsay ug kalinaw, mao kini hiniusang pag-ampo sa atong  kaigsuonang Muslim sa nasud sa pagsugat sa Eid’l Fitr. Panawagang dili gusto sa pipila ka mga grupo sa mga bandidong nangangkong sila mga Muslim. Atol sa bisperas sa Eid’l Fitr, 23 ka  tawo, bata ug tiguwang ug kasagaran mga  babaye ang nangamatay ug  kapin sa napulo ang nangaangol dihang gi-ambus sila sa gidudahang mga sakop sa Abu Sayyaf terrorist group sa Patikul, Sulu.

Ang unta malinawon ug sadya nga pagsugat sa Eid’l Fitr sa maong lungsod kagul-anan, kahadlok ug kaaligutgot ang naghari nianang mga adlawa.

Daghang misaway sa gibuhat sa ASG partikular na   ang mga lider sa mga Muslim sa Mindanao. Misaad sila inabagan sa gobiyerno nga lutoson ug taralon sa hukmanan ang mga responsable sa maong masaker. Ang gibuhat sa ASG masusama sa usa ka sagpa sa nawong sa Armed Forces of the Philippines ug sa Philippine National Police.

Usa ka senyales nga wala pa gyud hingpit nga nabuntog ang ASG bisan pa man sa pasiatab sa gobiyerno kabahin sa mga malampuson nilang kampanya kontra terorismo sud na sa nanglabay’ng dekada. Pirme lang manghambog ang militar nga nimenus na ang gidaghanon sa ASG, tinuod na tungod kay duna man gyuy nangamatay ug duna say nangadakpan tungod sa way puas nga  operasyon batok kanila.

Kining subling paghasi sa mga bandido epekto na kini sa pagbiya sa mga Amerkanong mitabang paglutos kanila gamit ang mga modernong gamit, mga gamit nga wala pa sa arsenal sa Pilipinas. Ang pangutana kaya ba gyud kaha ang ASG?