Ang aso

Ang aso wala’y kalainan sa abog. Pulos makadaut kun atong mahanggap.

Sa abog, nabulabog kini sa hangin nga may dalang mga mikrobyo, virus, abo ug bakterya. Samtang sa aso mas grabe pa kini hanggapon tungod sa makahilong hugaw o  kemikal toksins, nga namugna gumikan sa pagkasunog sa butang o likidong kemikals sama sa lana, gas, krudo ug uban pa.

Sama sa sigarilyo, ang aso nga mahanggap kini katumbas sa 100 kabuok niini, kay may gatosan ka kemikals kining gisambog, ug kini mosamot tungod kay mo-epekto kini og mas daghang makahilong kemikal reakyons, nga maoy nagpagrabe sa kadaut sa panglawas.

Gani kun mawala na ni sa panan-aw, nagpabilin ang bahong sunog sa palibot, padayon kini nga mahingos nato.

Kanang aso sa nagbarbekyu o nagsugba nga may mantika, mopuot ang mga aso nga kun imong hanggapon, makakanser ang nasunog nga mantika, sama ra sa makahilong lana.

Busa, basta kun dunay aso o nakapanimaho og sunog, pahilayo nga magsampong sa baba ug ilong nga may panapton nga gapason mora’g filter. O kaha, bas-a ang panyo aron di mahanggap ang aso.

Ayaw gyud kompyansa, labi na og huyang ang imong sistimang imyun sa panglawas mo, segurado dali ka ra masakit gumikan lang kay nakahingos og aso. Unang mga sintomas ini mao ang pagkalipong, allergy, ug pagkahubakon.

Nga kun dili matagad, mokomplikar kini’g daghang sakit sama sa atay, baga, paralisado ug uban pang balatian, nga nakahasol na noon sa inadlaw nimong gimhuhaton.

Sagad ra ba, unya na lang kun mograbe na, mao pay ilihok nato.