Ang hagit sa pupolasyon

Kaniadtong Domingo sa alas 12:35 sa tungang gabii nahimugso ang ika-usa ka gatos ka milyon nga tawo sa Pilipinas sa Dr. Jose Fabella Hospital sa Santa Cruz, Manila.

Siya mao si Baby Chonalyn, usa ka himsog nga bata’ng babaye nga anak ni Dailin Cabigayan ug Clemente Sentino nga usa ka van driver.

Ang pagkahimugso ni Baby Chonalyn nagdala og hagit ug oportunidad. Oportunidad nga atong dawaton nga bentaha ug hagit nga atong atubangon matud pa ni Juan Antonio Perez, Executive Director sa Population Commission.

Ang usa ka gatos ka milyon nga populasyon sa nasud nagpakita og oportunidad sa tanang katambayayong sa paghimo sa tawo nga husto’ng puhonan aron ang nasud makapangandam sa sukaranan sa pagkab-ot sa malungtarong siyudad.

Hiniusa ug produktibo nga kusog sa mga mamumuo nga nakapaandar sa patas nga paglambo sa ekonomiya nga makatampo sa kauswagan sa nasud ug henerasyon sa hingkod na nga katawhan nga himsog ug aktibo nga nakiglambigit sa sosyal ug ekonomikanhong  kalihokan sa komunidad, matud pa ni Klaus Beck, representante sa United Nation Population Fund dinhi sa nasud.

Sa laktod, ang populasyon dako’ng bentaha sa nasud nga himsog ang ekonomiya ug lig-on ang labor force. Busa ang isyu sa populasyon mahinungdanon kay wala lamang kini maghisgot og numero kun dili naghisgot usab kini sa tawhanong katungod ug oportunidad.

Sa ubang kanasuran diin mas kusog ang pagsaka sa ilang populasyon kay sa ilang ekonomiya, usa sa mga naapektohan mao ang mga panginahanglanon sa panglawas ug pagpanganak.

Ang paghikaw kanila sa panginahanglanong panglawas ug pagpanganak kalapasan sa tawhanong katungod nga mabuhi ug paghikaw kanila nga mahatagan og oportunidad.