Biktima sa politika

Wala na gayud ko makasabot sa dagan sa kagamhanan niini’ng dakbayan sa Sugbo. Kini kun ang kampanya paghakot og daghang mamumuhonan alang sa South Road Properties maoy ato’ng hisgutan.

Hangtud karon, walay maayo’ng relasyon si Mayor Michael Rama ug ang mayoridad sa mga sakop sa konseho kinsa mga kaalyado sa Bando Osmeña Pundok Kauswagan ni kanhi kongresman Tomas Osmeña.

Kini ang hinungdan ngano nga wala gayud moarangkada ang paningkamot sa dakbayan pagdani og dugang investors diha sa SRP. Gani, ang Japanese retirement facility nga giduso nga tukoron sa SRP mora’g namiligro nga dili madayon. Sa niaging mga semana, adunay taho nga interesado ang Damac Properties Company sa Middle East nga mobubo og bilyones aron pag-develop sa 10 hektaryas nga kaniadto Kawit Island diha sa SRP.

Apan mora’g wala na ako makadungog og follow-up sa maong proposal. Unsa na kaha ang nahitabo niadto? Mora’g hilom man ang konseho sa maong proyekto. Mi-backed out kaha ang Damac gumikan niining politikanhong gubot diha sa City Hall?

Tungod lagi kay mobabag dayon ang mga kaalyado sa BOPK sa mga proyekto ni Rama sa SRP, zero investment karon ang maong lugar. Kini gawas lamang sa duha ka proyekto karon – ang sa Filinvest ug SM – nga na-approved pa sa panahon nga mayor pa si Osmeña.

Nahisama na hinuon karon ang SRP sa usa ka white elephant. Wala na kini mikita alang sa panudlanan sa dakbayan apan ang kagamhanan sa siyudad kamulo pa og bayad sa foreign donor alang sa katukoran sa maong reclamation area.

Sa ako na’ng gikaingon sa nangagi nako’ng mga kolum, kining gubot tali sa duha ka habig diha sa City Hall mao na hinuon ang nagdala og dangan sa paningkamot sa dakbayan paghakot pa og dugang mga mamumuhonan.

Gusto kita og kalamboan pinaagi sa dugang mga investment ug trabaho apan aniay ato’ng mga lokal nga opisyales nagsige na hinuon og lantugi. Ug kinsa bay mga negosyante ang gusto mo-invest sa dakbayan niini’ng dulom nga sitwasyon sa SRP?

Bisan kinsa ang pangutan-on, daghan gayud ang gisayangan sa potensiyal sa SRP. Kini tungod kay klaro’ng biktima kini sa walay hunong nga politikanho’ng kumbati diha sa hawanan sa City Hall.