Nag-abang di mopahawa

Dear Atty. Divine,

Duna ko’y problema sa balay nga akong gipaabangan. Niadto pa’ng miaging tuig mi-expire ang kontrata niini ug wala nako i-renew kay akong ibaligya ang maong panimalay. Apan bisan kun na-expire na ang kontrata ang mga nag-abang nga magtiayon nagpadayon sa pagpuyo hangtod karon. Aduna nay buyer sa maong balay ug amo na unta sila’ng papahawaon apan gitubag ra man mi nga paghuwat lang mo kay mangita pa mi og kabalhinan. Amo na gani sila’ng gihatagan og pabor nga di na sila pabayron sa ilang utang namo nga rentals sud sa pipila ka buwan human mi-expire ang among kontrata. Unsa may angayan namo nga buhaton aron kini sila mamahawa sa among balay? Gusto unta namo nga karong katapusan sa buwan mopahawa na sila kay aron mabayran mi sa buyer, kinahanglan pa ba mi nga moadto sa korte aron sa pagpapahawa kanila? Hinaut nga imo mi nga magiyahan kun unsay angayan namo nga buhaton. - Chito

Dear Chito,

Ang una nimo’ng buhaton karon mao ang pag-adto og abogado aron kanang nag-abang mapadad-an og Notice to Vacate. Imong ipabutang sa imong notisya nga kutob na lang sila karong katapusan kay imo nang ibaligya ang maong property. Wa ko’y nakitang rason nga magpabilin pa gihapon ang nag-abang pag-okupar sa imong balay ilabi na kay dugay na nga mi-expire ang inyong kontrata. Apan kun pananglitan human sa inyong pagpadala og notice to vacate dili g’yud siya mopahawa, ang sunod nimo’ng buhaton mao ang pagdangop sa barangay diin mahimutang kanang imong balay nga gipaabangan. Mopasaka ka og reklamo sa barangay batok sa mga nag-abang sa imong panimalay aron sila mapatawag ug aron kamo magkaatubang ug magpatabang ka sa mga barangay official nga mapahawa kanang nag-abang sa imong pinuy-anan. Mamahimo ‘sab ka nga modangop sa korte apan mas dugay man gud ang proseso busa mas maayo nga ipaagi lang sa barangay ang pagsulbad sa imong problema. - Atty. Divine