EDITORYAL - Ang “anti poor” nga JAO 2014-01

Nagkagubot ang transport sector tungod sa kontrobersyal kaayong Joint Administrative Order 2014-01 sa Department of Transportation and Communications (DOTC), Land Transportation Office (LTO)  ug Land Transportation Franchising and Regulatory Board (LTFRB). Samtang maayo ang tumong sa maong order agi og pagdisiplina sa mga drayber, apan gihulagway nga sayop ug di makiangayon ang paagi sa pagdisiplina. Silotan diay si Juan kun ang nakasala si Pedro?

Dunay mga bahin sa maong kamandoan nga tataw kaayong wala moagi og makuting pagtuon o pag-analisar sa nagpanday niini kun makiangayon ba sa tanan. Sama  sa pagdili sa mga motorista nga i-modify ang ilang sakyanan o motorsiklo. Bisan unsang “modification” nga walay sertipikasyon sa manufacturer isipon nga paglapas na sa JAO 2014-01.

Way manufacturer nga moisyu og sertipikasyon kun ang piyesa nga gamiton “local” kay mahal ang original. I-accommodate ba kaha ang request kun liboan o minilyon na ka car ug motorcycle owners ang mangayo og sertipikasyon? Gihuna-huna ba nila nga ang manufacturers wa dinhi magbase sa Pilipinas?

Makita nga ang nagpanday sa maong kamandoan mga “elitista” mga adunahan nga maka-afford og palit og mahalon ug orihinal nga piyesa ug kun magkalisod mopalit pa og brand new nga sakyanan.

Ang JAO 2014-01 matawag  usab nga “anti-poor” kay dili baya tanang sakyanan pamasahero lang maoy tumong, dunay mga sakyanan sama sa mga motor nga gihimong delivery sa mga ginagmay nga negosyante. Wa na lang ba diay silay katungod nga moasenso?

Kadtong namaligya ug nanarbaho sa mga car ug motorcycle accessories, mga mekaniko nga manaod niini ug uban pa, patyon na lang sa gutom?

Tataw kaayo sa Konstitusyon nga dunay katungod ang matag usa ka Pilipino nga moasenso. Ug ang JAO 2014-01 dakong babag niini.