Tuo ka og survey?

Tunga-tunga sa mga isyu nga giatubang karon sa administrasyon, ang kontrobersiya sa Disbursement Acceleration Program (DAP) ug ning bag-o, ang sunod-sunod nga impeachment case nga gipasaka batok ni Presidente Noynoy Aquino, nitumaw ang bag-ong resulta sa survey. 

Ang yano’ng pangutana nga nag-aghat og managlahing reaksyon gikan sa publiko kun kinsa ang ilang iboto sa mga national leader kun karong adlawa ang piniliay.

Ang Pulse Asia nagpakita nga mas daghang mipabor ni Bise Presidente Jejomar Binay base sa gitubag sa 1,200 ka tawo nga gihimoan og survey.  Nakakuha siya og 40 porsiyento.

Usa lang si Binay sa daghan ug sum-ol na kaayo nga panga’n sa politika nga nipatigbabaw sa survey. Ang uban sa mga panga’n bag-o sa atong pandungog nga daw sila mismo ang nagpasukod kun mosalir ba sila sa piniliay sa 2016 kun sila molansar.

Kini ang hinungdan nga daghang punto ang angay nga tan-awon panahon nga manggawas ang survey results.  Mga pangutana nga posibleng wa’ motumaw sa yano’ng huna-huna sa publiko apan makahatag na og impluwensiya sa desisyon sa katawhan.

Sa dili’ pa mo-umol og pagtuo sa tagsa-tagsang huna-huna gikan sa mga nanggawas nga survey, angay nato’ng tubagon ang pipila ka pangutana nga posibleng makapausab sa atong opinyon sa mga survey.

Kinsa ang nagpa-survey?  Kanus-a nahitabo ang survey?  Kinsay nigasto sa survey?  Kinsa ang gipang-survey?  Unsay kahimtang sa mga tawo nga gipang-survey panahon nga gipa-ubos sila sa survey?  Unsay mga isyu nga giatubang sa nasud panahon nga gipahigayon ang survey?  Unsang orasa na-survey ang mga tawo?  Ug uban pa’ng pangutana.

Samtang atong gidayeg ang maong matang sa pagsukod sa pulso sa katawhan, usahay di’ makaayo ang mga political survey nga motumaw sa di’ pa unta tukmang panahon.  Duha ka tuig sa dili pa ang presidential elections sa 2016, dili makiangayon nga adunay survey results nga motumaw batok sa naglingkod nga presidente o pamunoan kay magmugna kini og pagbuak-buak sa unta nagtinabangay nga katawhan ug mga opisyal sa gobiyerno.

Makiangayon lang nga adunay mga survey kabahin sa performance sa presidente ug kun nakontento pa ba ang katawhan sa iyang duwa sa gobiyerno.  Apan kun ubanan ni og laing survey result sama sa kinsay gusto sa mga tawo nga mamahimong mosunod nga presidente, dinhi na kita angay nga makuryoso sa unsa g’yud ang tumong sa maong survey.

(Email: [email protected]. or [email protected].)