Ebidensiya batok ni Garcia

Magkatawa ang pamilyang Garcia, ilabi na si kanhi gobernador karon Kongresista Gwendolyn Garcia kun mahalin kanang kontrobersiyal nga Cebu International Convention Center (CICC).

Sa mga kasong giatubang ni Garcia, kining CICC maoy usa sa labing dako ug mismo ang edipisyo makasulti sa “overpricing” sa pagtukod niini. Kun nahinumdom kamo, ang Balili property nga usa usab sa dakong kaso ni Garcia, gipatabonan niadtong mga panahon nga hapit na siya mobiya sa Kapitolyo.

Sa kasong kriminal, gikinahanglan ang epektibo nga ebidensiya batok sa akusado. Mao kini gitawag og “corpus delicti” kon “body of the crime” nga maoy gamiton pagkonbikto.

Kay ang isyu sa Balili property mao man ang pagpalit niini bisan nag-unlod kini sa tubig-dagat, gi-reclaim og dalidali sa Kapitolyo sa katapusang mga buwan sa termino ni Garcia. Karon nga gihunahunaang ibaligya ni Gobernador Hilario Davide III ang CICC, dili ba kaha mawala ang ebidensiya sa kasong “graft” nga giatubang ni Garcia tungod sa matud pa overpricing sa maong proyekto?

Pananglit og modagan na ang duha ka kaso ngadto sa Sandiganbayan, unya modesisyon ang korte sa paghimo og ocular inspection, unsa na man unya’y makit-an sa mga mahistrado? Nagkinahanglan na hinuon aksiyonan ang CICC tungod kay sa pagka-substandard sa pagkatukod niini, dili na kini magamit human maigo sa linog niadtong miaging tuig. Daan na kadtong gubaon nga kun mobundak ang kusog nga ulan, mahimong kalangoyan ang sulod sa CICC.

Apan ang ako lang mao ang pag-secure sa mga ebidensiya batok kang Garcia.

* * *

Nalipay na kaayo ko nga naninguha ang mga opisyal sa lungsod sa Minglanilla nga makuhakuhaan ang kahuot sa trapiko pinaagi sa pagpakatap og mga traffic enforcer nga sakop sa MITCOM.

Dili na usab parehas kaniadto nga magtuhoy ra gyud ang mga sakop sa MITCOM ug magtanga lang sa daplin. Karon, mowara-wara na gyud sila sa ilang mga kamot, mohuyop na gyud sa ilang sirbato ug mobadlong na gyud sa mga multicab nga PUJ, traysikol ug mga habalhabal. Tingale, mao kini ang giuna sa pagtagad sa bag-o nga gi-appoint nga konsehal, Jimmy Caumeran, kinsa mipuli sa namatay nga konsehal, si kanhi mayor Eddie Selma.

Wala hinuon ko makahibalo kun aduna bay ordinansa nga nagpatuman og multa sa mga malapason nga mga drayber. Apan maayong pangutan-on atong higalang si Bise Mayor Jojo Selma kun aduna ba kini ordinansa aron ipatuman sa mga sakop sa MITCOM. Nindot na kaayo kini kun magpadayon aron adunay “flow” sa trapiko nga dili na makasapot sa mga motorista.

Sulayi kuno kini.