EDITORYAL - Kapitan nga walay pulos

Ang pag-ukon-ukon sa kadaghanang mga opisyal sa barangay pagpatuman sa balaod diha sa ilang masi’g ka teritoryo, maisip nga palpak sila pagtuman sa ilang katungdanan.

Usa sa gilatid nga katungdanan sa kapitan sa barangay base sa Section 389 (1) sa Republic Act 7160 kon Local Government Code “Enforce all laws and ordinances which are applicable within the barangay.”

Gilatid pa g’yud nga ang mga kapitan kinahanglan nga moabag sa mga mayor ug konseho sa ilang dakbayan o lungsod kabahin sa ilang katungdanan. Wala malilong nga ang mayor maoy gitugyanan base sa Republic Act 8551 sa kampanya sa ilegal nga sugal.

Apan daghang kapitan ang nag-ukon-ukon paghimo’g kampanya sa ilegal nga sugal sa ilang dapit kay maikog ug malooy sa ilang katagi-lumolupyo nga kuno makulban og kaldero kay ang pag-operate nila og ilegal nga sugal sama sa video karera giisip nila nga panginabuhian.

Nagpasabot nga kini’ng mao nga mga kapitan ug opisyal sa barangay dili haom sa ilang katungdanan kay gipasuwabi man nila ang pagpiyong sa ilang mga mata aron dili makita ang ilegal nga kalihukan sa ilang dapit.

Apan adunay nagduda nga may lawom pa nga rason kun ngano nga kini’ng mao nga mga kapitan nagpakabuta-bungol lang ug nagpakahilom, dayon gikyogpos ang ilang mga bukton.

Kay nakadaog man sa eleksyon ang mao nga mga kapitan magduda kita nga daghan na tingali sa mga botante sa ilang dapit ang nalambigit na sa ilegal nga binuhatan ug gipadaog ang mao nga tawo aron adunay makalaban kanila.