Karon ang kaugmaon

Mahimong managlahi ang atong pangagpas sa kinabuhi, apan usa ra ang tumong nga mapangandaman ang atong maayong kaugmaon. Usa kini ka kakulian sa pagdisisyon, kun unsa g’yuy angay nga buhaton.

Dili kalikayan nga usahay mao na lang ang mosantop sa panghunahuna, nga basta mobuhat lang, igo na kini kaniya nga sagad, maglisud pa gani nga makaabot para sa ugma.

Kini ang mahitabo kun dili nato ibuka ang panan-aw sa palibot, maingon man ang paglantaw sa kabililhon sa pangandam sa kaugmaon. Ang gisagop gud nato mao man ang prinsipyo nga iseguro ang karon ug bahala na kun unsay mahitabo sa kaugmaon.

Pero dili ikalimod, way usa kanato nga wala mangandoy og kaharuhay ug maayong kahimtang sa kaugmaon. Busa, isip pagpahiamgo atong tun-an ang kaugalingon, para dili mausik ang kahago nga halos wala nay panahon kumustahon ang sitwasyon kun naunsa o asa na kita sa kinabuhi.

Basi’g naglaum ka pa sa kaugmaon nga anaa ka na diay sa maong panahon, nga padayon nag-antos sa pakigbisog nga way kapuslanan. Hinoon, samtang may kinabuhi pa aduna pay paglaum nga mahimo pa ang tanan.

Ang tinuod lang, kulang ta og disiplina nga ibalanse ang karon nga adlawa, may dakung bahin kini nga dili lang ang ugma hasta na ang imong kaugmaon. Di nato taligam-an nga unsa may gibuhat karon, apil na niana ang alang sa umaabot.

Kini tungod kay gitagan-an mo ang kaugmaon kanunay diha sa pagkakaron, dili mo damhon, nakatungtong ka na sa pagpahimulos sa malipayong kaugmaon.

Ayoha lang g’yud ang pagbahig o pagahin, kun maapiki ka man ayaw g’yud himoa nga unya na ang alang sa umaabot kay mawad-an ka unya og kahigayonan nga ihaw-as ikaw sa pagka-uyamot.

Luyo sa hinurot nga paningkamot, ayaw ‘sab isakripisyo ang himsog nga panglawas. Puhonan kini nga maoy mopalig-on sa kaugmaon kay kun masakit ka, basin kini maoy mo-ut-ot sa imong tinigom.

Kun batan-on ka pa, ayaw usiki ang imong panahon sa mga butang nga maghatag lang nimo’g suliran. Mahasol ka nga dili na unya ka kahinultol, nga mawad-an sa kadasig sa kinabuhi nga mao na lay himoon nga rason nga unsa may moabot - sa kahitas-an kana nga pagbuot.

Busa kun karon, sigi ka la’g pahayahay, segurado nga inig-abot sa kaugmaon igo kana lang unya sa pagmahay.