Tingog sa mga Pilipino

Naglibog na kita kinsay sakto. Apan alang kang Presidente Noynoy Aquino, siya ug ang Malacañang lamang ang sakto.

Human na modesisyon ang Korte Suprema nga unconstitutional ang tulo ka mga “scheme” sa Disbursement Acceleration Program sa administrasyong Aquino.

Apan hangtod karon, wala mahimutang ang mga gaway ni Noynoy pagpanaway sa desisyon sa Korte Suprema kay gusto gyud nilang ipadayon ang DAP ginamit kadtong mga buhat nga gideklarar sa mga mahistrado nga nakalapas sa 1987 nga Konstitusyon.

Ang Korte Suprema nakakita nga unconstitutional ang mosunod nga scheme sa DAP:

-           ang paggamit sa savings sa usa ka ahensiya bisan wala pa mahuman ang tuig;

-           pagbalhin sa savings gikan sa ehekutibo paingon sa laing departamento gawas sa ehekutibo (cross-border transfer); ug

-           pagpundo og proyekto, kalihukan ug mga programa nga dili “covered” sa General Appropriations Act.

Ang mga gaway ni Noynoy nagtuyok lukop nasud aron ilang alkontrahon ang desisyon sa Korte Suprema. Inay ilang ibutang sa motion for reconsideration ang ilang mga argumento, gideretso kini sa administrasyon ni Noynoy ngadto sa mga tawo.

Pero wala ko mahadlok niini kay ang mga tawo lisod nang mailad.

Dungandungan sa paggawas sa desisyon sa Korte Suprema mao ang pagtikyaob sa popularity ni Noynoy sa survey sa Social Weather Station ug Pulse Asia nga nagpasabot nga kinabag-an sa mga Pilipino wala na makauyon sa iyang dinad-an sa Pilipinas.

Ning pagsungag sa Malacañang sa Korte Suprema, walay koy nakitang krisis politikal kay ang mahistrado wala mopaak sa pagkapalaaway nga pamunoan ni Noynoy.

Sa akong pagtuo modesisyon kini subay sa ilang nahibaw-ang sakto sumala sa Batakang Balaod ug subay sa konsensiya sa katawhan. Vox populi vox dei. Ang tingog sa katawhan tingog sa Dios.