Sila’y nakakulong, tayo’y nagdurusa

Kaso ni Napoles ay hindi pa tapos

kaya itong bansa’y naghihikahos;

kahit nakakulong tuloy ang pag-ubos

sa pera ng bayan sa bawat pagkilos!

Labas-pasok siya sa kanyang kulungan

na ang ginagastos ay pera ng bayan;

mga nagtatanod ngayo’y nasasaktan

dahil pondo nila’y nauubos na raw!

Kay dami ng pera na kanyang nakuha

ang tanong ng bayan saan ‘yun napunta?

at ang mga taong tulad nya’y may sala

maganda’t konkreto ang kulungan nila!

Marami sa ating mga kababayan

dahil sa dalita natutong magnakaw;

pag nahuli sila tuloy sa kulungan

bartolina nila’y mabantot malangaw!

Pero tingnan mo nga ang ibang maysala

na napakaraming ninakaw na pera;

kumpleto sa gamit kulunga’y maganda

sa custodial center ang trato’y maganda!

Sa tuwing lalabas sa mga piitan

may escort na pulis at mga militar;

dadalo sa hearing -- pupuntang ospital

mga kamag-anak ay nakaalalay!

Kaya kitang-kita ang malaking agwat

ng taong mapera sa taong mahirap;

maraming ninakaw -- buhay ay masarap

simpleng magnanakaw ang kulunga’y wasak?

at ang mayamang ngayo’y kalabuso

tuloy sa pagwaldas sa pera ng tao;

Diyos ko, Diyos, bakit ba ganito

nangyayari ngayon sa ating gobyerno?