Commitment

Installation sa mga lectors sa Guadalupe Parish Church sige la’g ka-postpone kay nakita sa pari, Fr. Torvs nga sagad sa miyembro wala makaila unsay tinuoray’ng kahulogan sa pulong: ‘commitment’?

Lalim bay, magpatawag og binulang miting ang coordinator sa Lector Ministry, pastilan, diyotay ray manunga. Patambungon og Lector Reading Enhancement sa Binisaya ug Iningles nga pinulongan, lima ngadto sa pito ray manambong sa 40 kapin ka buok nga mga lectors. Usahay, wala gyud. Grabe katig-a’g dughan!

Dihang gipangutana unsay rason nganong di motambong, sila namahayag:

“Wa man gud ko tugti sa akong bana, Brod. Unsaon, busy man gud ko’g bantay sa Kahago Project kada-Domingo sa simbahan.” “Kakaraan na namong lector, unya tudloan la’g bag-o?”  “Uy, ngano man diay’g di ko mo-attend? May magbuot ba nako? Nga voluntary man ning akong pagka-lector?”

Haskang daghana’g alibi. Nagpaila lang nga wa sila masayod unsay matuod nga kahulogan sa ‘commitment’?

Ang commitment usa ka responsibilidad, usa ka obligasyon, usa ka saad nga bisan pa sa daotang panahon nga buot mobabag nato: rain or shine, kinahanglan gyud kining tumanon.

Gawas lang kaha kun ikaw, masakit, diin dili na makalakang imong mga tiil paingon sa dapit nga inyong gisabotan.

Gani, bisan pa ning maong kahimtang, maningkamot ka gihapon nga maka-communicate ngadto sa tawo nga imong gisaaran sa rason nganong di ka makaadto? Buwahan, di siya matagbaw’g pinaabot sa wala.

Mao kini ang dyewen nga kahulogan sa commitment. Usa ka debosiyon. Usa ka tulomanon nga angay tumanon.

Usa ka kontrata ngadto sa atong isig ka ingon ug sa atong Ginoo nga compulsory gyung buhaton.

Kay oras nga mapakyas ta paghimo sa unsay atong gisaad Niya, dako kaayo ning tulobagon nato pag-abot sa higayon nga kita moatubang na Kaniya ug Iyang hukman.