Kalamboan sa tanan

Matag pangulo sa buhatan sa gobiyerno may kaugalingon nga panglantaw alang sa maayo nga kaugmaon sa ilang lalawigan, siyudad ug lungsod.

Sa State of the Province Address (SOPA) ni Gobernador Hilario  Davide III, iyang giawhag ang mga mayor sa mga siyudad ug lungsod nga  naglangkob sa tibuok probinsya nga mag-inabtik kay ang kauswagan sa ilang mga dapit, kauswagan usab sa tibuok lalawigan.

Sama usab sa gibatbat ni Mayor Michael Rama sa iyang State of City Address (SOCA) nga gusto siya nga matanos ang hiwi, mahinlo ang hugaw, mohumot ang baho, ug uban pa nga mga panglantaw alang sa kalamboan sa matag barangay.

Kay ang kauswagan sa matag barangay, kauswagan usab sa tibuok dakbayan sa Sugbo.

Sa SOCA ni Mayor Johnny De los Reyes sa Talisay City susama gihapon sa gipangandoy nila ni Gobernador Davide ug Mayor Rama nga  angay makigtambayayong ang katawhan pagbaswat sa mga gimbuhaton nga alang sa kauswagan sa panginabuhi sa matag pamilya.

Gihagit ni Mayor De los Reyes ang matag kapitan sa barangay sa pakig-alayon kaniya sa unsa man nga mga proyekto nga iyang ipatuman alang sa panginabuhi.

Ang Talisay maoy usa sa giila kaniadto nga hinlo og baybayon ug dagat, busa kinaham kini nga kaligoanan ilabi na sa mga adlaw nga Sabado ug Domingo.

Apan miabot ang panahon nga midaghan ang nanimuyo sa daplin sa baybayon ug hangtod nga gihimo na lang pansayan ang baybayon sa Talisay niadto’ng mga tawo nga walay kaugalingong pansayan.

Gusto ni Mayor De los Reyes nga mahibalik ang kahinlo sa baybayon sa Talisay pinaagi sa pakighiusa sa katawhan sa tumong pagpalambo sa kinatibuk-an nga dakbayan. ([email protected])