LTO paspasi pa ang dakop!

Wala g’yud kita’y mahimo kun ang kadagkoan sa Department of Transportation and Communication (DOTC) dili pa mo-deputize pagka karon, bisan sa mga polis ug traffic enforcer aron makatabang unta kanila pagdisiplina sa abusado nga mga drayber.

Ang epekto niini mao nga modagsang ang mga badlongon nga drayber kay ang pipila lang ka mga sakop sa Land Transportation Office (LTO) dili makaato pagdakop sa puwerte’ng daghana nga mga badlongon.

Samtang nagsultihanay kami ni LTO-7 Regional Director Arnel Tancinco pinaagi sa cellphone kagahapon sa buntag, ako siya nga giingnan nga maglagot g’yud ko magtan-aw sa mga sakyanan nga gitaptapan og itom nga bildo ang plate numbers.

Diha-diha siya miingon nga tinuod ang akong obserbasyon ug gani, atol sa among pagsultihanay, usa ka sakyanan nga diha sa iyang atubangan (kay nagbiyahe man siya) ang plate numbers gitaptapan og itom nga bildo.

Matud ni Tancinco nga iyang padad-an og subpoena ang tag-iya sa mao nga sakyanan. Puwede ra ‘sab apan ang nindot g’yud mao nga dakpon dayon ang drayber ug pamultahon og P5 mil base sa bag-ong lagda sa Joint Administrative Order 2014-01.

Sa gibalik-balik na nako, binuang kaayo ang gihimo sa mga tag-iya niini’ng mao nga mga sakyanan nga ang plate numbers sa luyo gitaptapan og itom nga bildo. Wala g’yud intawon sila makasabot nga mahinungdanon kaayo ang plate numbers.

Kini’ng mga tawhana aduna g’yuy plano nga mosibat kun makahimo og salaod ug gituyo nga gitaptapan og itom nga bildo ang plaka aron dili dayon makita. Kay ang kadagkoan sa DOTC dili pa man mo-deputize bisan mga polis, hala, paspasi ninyo ang pagpanakop.

Usbon nako, walay problema kun ang DOTC mohukom nga sila na lang maoy manakop sa makahimo og kalapasan sa Republic Act 4136. Ang gikuyawan lang nako nga mahisama sila sa PDEA nga maoy gitugyanan pagpanakop sa mga drug pushers, druglords apan walay nahimo.

* * *

Gitug-anan ko ni Cebu City Police Office (CCPO) director Noli Romana nga gimando na niya ang pagsakmit sa mga video karera kilid sa barangay hall sa Pahina-San Nicolas nga gipasagdan ra sa mga opisyal sa barangay.

Hilom kaayo si Kapitan Antonio Caruzca nganong wala siya makaaksyon niini’ng mao nga sugalan duol ra sa iyang barangay hall.