EDITORYAL - Ang calamity aid sa Cebu City Hall

Pipila na ka konsehal sa Cebu City ang miuli sa ilang nadawat nga ‘tag P20,000 nga calamity assistance human napasaka ang usa ka administrative complaint didto sa Office of the President batok ni Mayor Michael Rama ug uban pa nga mga opisyal sa siyudad.

Gipasabot hinuon sa city attorney nga bisan og giuli pa sa mga opisyal ang nadawat nila nga calamity assistance, mahimo nga wala ra kini’y epekto sa reklamo nga gisang-at batok kanila didto sa Malacañang.

Maayo nga naa’y mga opisyal nga miuli sa nadawat nila nga hinabang apan unsaon na man lang ang ubang mga empleyado sa city government nga dili maka-uli diha-diha dayon sa kuwarta?

Sa miaging tuig pa gipanghatag ang maong calamity assistance human sa pag-igo sa 7.2-magnitude nga linog ug sa pagkuso-kuso ni super typhoon Yolanda. Hagbay ra gayud nga nahurot og gasto sa mga empleyado ang mao nga hinabang.

Dili ikalimod nga maayo ang intensyon sa pagpanghatag sa maong calamity assistance bisan pa og dili kaayo dako ang epekto sa duha ka katalagman nga miigo sa siyudad kay nakatabang man gihapon kini, ilabi na niadto’ng mga kawani nga naguba g’yud ang kabalayan.

Pero ang gibuhat sa ubang konsehal pag-uli sa kuwarta nagpakita lang sa disparity sa sitwasyon sa City Hall. Maka-uli ra dayon ang mga aduna’y kuwarta, apan unsaon na lang kadto’ng wala?

Ihiklin usa nato ang isyu kun legal ba o dili ang paghatag sa maong hinabang. Ang leksyon nga nakuha niini mao nga sa dili pa manghatag og bisan unsa’ng matang nga financial assistance, estudyohan gayud usa pag-ayo aron dili mahimo’ng problema ang tinguha nga pagtabang.