Pasayloa ako

Human modemanda sa pagpangayo og pasaylo ang inahan ug pamilya nga gipakauwawan sa pari nga si Romeo Obach, ang pari wala maglangan ug nangayo dayon og pasaylo.

Sa iyang sinuwat nga apology nga namantala sa social networking sites, ang pari miingon nga kinasing-kasing siya nga mangayo og pasaylo ngadto sa hingtungdan, iyang kaliwatan, kahigalaan ug sa mga tawo nga misaksi sa bunyag.

Nangayo usab siya og pasaylo sa publiko, sa mga nakakita sa video, sa mga nakadungog ug sa mga sakop sa media.

Si Padre Romeo Obach gisaway sa liboan ka social networking sites users and viewers tungod sa pagpakauwaw niya sa menor de-edad nga inahan nga nagpabunyag sa iyang anak sa simbahan sa Jagobiao, Mandaue kaniadto’ng Domingo.

Samtang akong gihangop ang pagpangayo dayon og pasaylo sa pari ngadto sa hingtungdan nga iyang gipakauwawan, ako pud nga isugyot ngadto ni Padre Obach sa pagpangayo og pasaylo sa hingtungdan sa personal, ug dili sa suwat-suwat lang aron dili siya maklaro nga talawan sa pag-atubang sa iyang nahimong kasaypanan.

Angay nga personal ang pagpangayo og pasaylo sa pari tungod kay personal man niya nga gikasab-an ug gipakauwawan ang menor de-edad nga inahan nga nagpabunyag sa iyang anak nga wala diha ang amahan.

Ang hitabo nakapabanhaw na usab sa mga kontrobersiya nga naglambigit sa pipila ka mga pari mao nga tukma kaayo nga  himoan dayon kini og lakang sa kongregasyon nga ang pari sakop aron dili madamay ang uban.

Si Padre Romeo Obach gidisiplina na sa iyang mga labaw ug wala na tugoti nga makasaulog og misa. Sa sunod, kun tugotan ka pa nga mosaulog og misa, ayaw na kadto usba ang imong gihimo padre. ([email protected])

(Aduna hinuoy panultihon nga nagkanayon -- ang pagpakasala tawhanon samtang ang pagpasaylo, balaanon – Editor)