EDITORYAL - Pag-ban sa fraternities

Duna na say nakalas tungod sa hazing sa usa ka initiation rites sa usa ka fraternity, ug ning tungora nalambigit ang Tau Gamma Phi fraternity didto sa kaulohan.

Niining kasoha,  subli na usab nga nasukod ang kalig-on sa balaod nga Anti Hazing Law nga nagtangag unta og bug-at nga silot niadtong mga malapason.

Husto ang baruganan nila ni Presidente Benigno Simeon Aquino III ug Bise Presidente Jejomar Binay kinsa usa ka fratman nga dili kinahanglan i-ban ang fraternities ug sororities tungod kay dakong kalapasan sa Konstitusyon ang paghimo niini.

Sa habig sa hustisya, trabaho sa mga imbestigador ang pagsiguro nga mataral sa hukmanan ang mga malapason aron mahatag ang hustisya ngadto sa mga nabiktima.

Sa habig usab sa liderato sa mga fraternities ug mga organisasyon, kinahanglang seryusohon nila ang pagsunod sa maong balaod kay kini espesyal nga gihimo alang kanila isip garantiya nga dili sila makasala ug ingon man dili sila mabutang sa mga kontrobersiya.

Way dautan ang pag-apil sa fraternities, ang nakabati lang niini kun dunay mga miyembro nga mosimang gyud sa balaod. Dili man tanang fraternities ang naghimo og krimen mao nga dili makiangayon nga haruson ang maong mga kahugpongan. Lisod pasabton ang publiko kabahin sa fraternities ug sororities kung wala sila mahisakop niini, mao na nga kinahanglang pamatud-an sa maong mga grupo nga sayop ang mga pagduda kanila .

Simple lang,  buhaton gyud unta kung unsay mga maayo nga naa sa tagsa-tagsa ka “by laws”, kadtong mga makadaot nga mga probisyon usbon ug ipahaom sa balaod. Angay nga dili hikalimtan sa mga fraternities ug mga organisasyon ang tumong niini nga makahulma og mga maayong lider sa mosunod nga henerasyon.