Angay bang ikasuko kun tudloan ta’g anak?

“Mga ginikanan, unsay inyong bation kun tudloan mo’g anak?” Gibalhinbalhin ko’g labay kining pangutanaha ngadto sa mga Mama. Ug ilang tubag usa ra: “Siyempre, masuko gyud!”

Nganong masuko? Ania ilang rason: “Buing no! Kita maoy nagmatuto nila, kita’y  nagpadako nila, kita’y naggiya nila...unya, mao pay manudlo nato?”

Nakapahiyom ko sa ilang gisulti. Nabasa man gud nako diha sa ilang panagway ang hinungdan nganong dili sila magpatudlo sa ilang anak? Kini tungod sa garbo. Nagtuo ang mga ginikanan, nga tungod kay una sila sa duyan, mas daghan sila’g nahibaw-an kay sa ilang liwat. Nga wala’y wa masayri sa anak nga wa masayri sa ginikanan. Sa laktod, super knowledgeable ang parents. Busa, di sila angay tudloan sa ilang anak.

Nalimot ang parents. Nga ning kalibotan, no man is perfect. No man is an island. All of us need one another in order to live, to grow and to be improved! Dili ingnon nga tungod kay usa ka na ka amahan o inahan, nasayod ka na sa tanang nahibaw-an sa imong anak. Sayop! Usa ka dakong sayop nga konsepto!

Naay, hunahunaa lang...kaniadto, sa Grade 1 ngadto sa siksto, magbinisaya among titser pirme sa klase. Gidasig mi sa pagbasa kanunay sa binisayang magasin sama sa: Suga, Alimyon ug Bisaya. Resulta, maayo ko mobasa’g binisaya, pero kiwaw mosulti’g iningles. Gumikan niini, nagpatudlo ko sa akong anak, kinsa graduwado sa Mass Com, St. Theresa’s College ug trainer pa gayod sa mga bag-ong call center agents nga nadawat sa ilang trabahoan.

Hapit kada words nga akong gibasa, sango ko pirme. Kay koreksiyonan man ko sa akong anak. Apan wa ko kini ikasuko. Hinunoa, puwerte pa nakong lipaya. Ngano?

Tungod kay sa kamapinanggaong mga ngabil, iya kong gihagkan: “At least, wa ka magmahay, Tay, nga didto gyud ko nimo pa-eskuwelaha sa mahalong tunghaan. Tiaw bay, kaugalingon mong anak, nahimo mong titser?”