HID nga suga angay’ng idili g’yud
Congratulations sa akong kanhi manager ug karon Konsehal Rene Alquizola sa lungsod sa Barili.
Wala magmahay ang taga Barili nga mipili ni Konsehal Alquisola kay kugihan siya nga pagka opisyal. Si Konsehal Alquisola maoy labing daghan og nahimo nga ordinansahon ug resolusyon.
Usa sa iyang mga gisugyot nga ordinansahon mao ang paggamit sa mga sakyanan nianang hayag kaayo nga suga nga gitawag og High Intensity Discharge (HID).
Kini si Konsehal Rene nagtubo sa pamilya nga nagpadagan og mga sakyanan nga pasaheroan ug pribado ug nasayod kaayo siya unsa ka bati ang paggamit nianang mga HID.
Hinuon kadto’ng bag-o pa nakabaton og sakyanan nindot g’yud alang kanila ang HID nga suga, apan sa mga kasugat nimo magabii, tagsa ra’y modayeg kanimo.
Dili lalim nga mora’g pisokon ang imong mata sa kasuwaw sa kahayag nga usahay mapawong ang imong panan-aw sa HID nga suga sa sakyanan nga imong ikasugat.
Daghan kaayo’ng mga drayber nga manungo gani ug manghimaraot kanimo ilabi na niadtong hapit makadasmag og laing sakyanan kay nawad-an sa kahayag diha’ng nasuwawan sa HID nga suga sa iyang gikasugat.
Hinuon ang tagsala niini mao ang mga pabrika og sakyanan nga nanaod niini’ng HID lamp.
Manghinaot kita nga kining ordinansa ni Konsehal Rene kahatagan og dako’ng gibug-aton ug maputol na ang paggamit sa mga sakyanan og HID nga suga.
Kun ang stereo sa mga PUJ gidili kay makabungog sa mga pasahero, nagtuo kita nga mas labing dili maayo nga itugot ang paggamit sa HID lamp sa sakyanan.
Sa stereo sa PUJ dunggan ra sa mga pasahero ang masakitan, apan sa HID lamp mata sa driver maoy mawad-an og kahayag ug delikado kaayo sa iyang mga pasahero ug sa mga butang ug kinabuhi sa kadalanan nga masugamak kun madasmagan sa iyang sakyanan.
- Latest
