Tua pa sa ikapitong bungtod!

Mao kini ang tubag kun ang adtoonon sa usa ka lumolupyo sa bukid hilabihan pa kalayo nga kun baklayon, modiwalwal gyud imong dila. Pero ingon niini akong paghulagway sa eleksiyon sa 2016 sa Argao.

Ang gilay-on sa eleksiyon ning maong lungsod tua pa unta sa ikapitong bungtod apan hilabihan na man ka-init nga hasta na ang dili unta politiko nga mayor nga si Edsel Galeos gikasohan sa Department of Environment and Natural Resources (DENR-7) kay lagi namutol kuno og mga kahoy sa usa sa sitio Binalabag, barangay Jampang, apan ang kaso klarong “politically motivated.”

Unsaon man pagserbisyo sa katawhan pinaagi sa farm-to-market road kun dili putlon ang mga kahoy nga agian sa karsada? Unsa may gusto sa DENR pakatkaton sa kakahoyan ang mga sakyanan nga mangagi?

O pakumpayaton lang sa bagon ang mga tawo labang paingon sa pikas bungtod?

Proyekto nga ikaayo sa katawhan sa Jampang ang gihisgutan, apan unsa may tuyo sa DENR-7 sa pagdili sa paghawan sa lugar asa ipaagi ang karsada?

Apan mikagot akong bag-ang sa pagkadungog nako nga si DENR-7 regional director Isabelo Montejo usa diay ka Argaoanon. Ngano man diay og taga-Argao si Montejo? Unsa may labot niini sa kaso ni Galeos?

Dili kay kana ra, si Montejo gikatahong moretiro na sa iyang katungdanan ning tuiga, ug adunay kasaligang tinubdan nga misulti nga siya diay ang gihugonhugonan nga i-tandem ni Bise Mayor Stanley Caminero nga nagplanong modagan pagka-mayor karong 2016.

Si Galeos dili na makadagan tungod kay katapusan na niya kining termino. Apan gipiitpiit pa gyud kini sa kampo ni Caminero, ug nag-apil-apil si Montejo gamit iyang gahum isip DENR-7 regional director nga maoy nagsuperbisar sa tanang timberland sa rehiyon siete. Maayong imbestigahon sa DENR central office sa kauluhan kining maong kaso sa Argao.

Sa ingon, mahibaw-an kun gi-abusohan ba ni Montejo iyang gahum aron pagduso sa iyang “political ambition” sa Argao.

Ning gibuhat sa mga Caminero ug ni Montejo, nagtuo ko nga dili madutlan ang mayor. Nasayod ang mga Argaoanon nga bisan napupos ni Galeos iyang tulo ka termino isip mayor, wala siya ma-usab.

Sa mga tawo pa, si “Mayor Edsel wa gihapon mahimong politiko ug wa makaon sa sistema sa bulok nga politika.”

Makasabot hinuon ang mga Argaoanon nga si Caminero ug Montejo ang migawas nga “anti-Argao” ug dili ang mayor nga naninguha og mga proyekto alang sa katawhan nga gustong pakgangon sa duha.