EDITORYAL - Dredging sa sapa gibinuangan lang

Matag higayon nga lagum kaayo ang kawanangan ug kauwanon, daghang katawhan nga dia mag-opisina o magtrabaho sa downtown area sa dakbayan sa Sugbo bation gayud og kakulba.

Kakulba tungod kay sa pagpaingon nila sa ilang mga opisina mahimo'ng mapugngan sila tungod kay malunopan man ang mga karsada kay moawas man ang tubig sa sapa.

Dugay na kaayo kini nga problema apan ang mga tinugyanan sa dakbayan wala gayud makasulbad. Ang mga opisyal migasto na og minilyon ka pesos aron kunohay palawman ang sapa sa tumong nga dili na moawas ang baha.

Apan ang kuwarta nga gigasto sa dakbayan ingon sa nausik lang kay nagpabilin nga wala masulbad ang paglunop sa kinapusorang bahin sa dakbayan kun mobunok ang ulan.

Ang sapa nga sagad moawas ug maoy makapalunop sa downtown area mao kini'ng gitawag nila og Estero Parian kon Parian Creek nga nagtadlas ilawom ug kilid sa mga balay-patigayon sa dalan Colon.

Wala malilong sa katawhan nga nagpuyo daplin sa mao nga sapa nga diha nga gipahigayon ang pagpalawom kunohay sa sapa nga gigastohan og minilyon ka pesos, ang makita ra daplin sa karsada maoy ilang gipalawman.

Ang tunga-tunga nga bahin sa maong sapa wala nila haw-asi sa lapok. Kini maoy hinungdan nga wala gayud masulbad ang pag-awas sa Estero Parian.

Kun gitarong pa sa pagpalawom ang mao nga sapa ug gitan-aw pag-ayo sa kadagkoan sa Department of Engineering and Public Works (DEPW) ang pagpalawom sa sapa, tingali nasulbad-sulbad na ang paglunop dinhi sa mga lupa nga bahin sa dakbayan.