Dalaygon nga lakang sa Citrasco

Nindot kaayo ang gihimo sa kadagkoan sa City Integrated Transport Service Cooperative (Citrasco) nga pagsibog sa gidemanda nila nga usbaw sa pletehan sa mga passenger jeepneys.

Giawhag unta sa Citrasco ang kadagkoan sa Land Transportation Franchising and Regulatory Board (LTFRB) nga itugot ang pagpausbaw sa minimum nga pletehan sa mga PUJ gikan sa P7.50 ngadto na sa P10.

Apan atol sa public hearing kagahapon nga gihimo na unta sa LTFRB sa petisyon sa Citrasco, ang pangulo sa mao nga kahugpongan nga si Benjamin Ryan Yu misibog sa ilang demanda.

Mihugyaw sa kalipay ang mga sumasakay. Hinuon, bisan og ang LTFRB mohatag og dugang 50 sentimos nga umento sa pletehan ngadto sa mga PUJ drivers, dili na man sakitan ang mga sumasakay.

Daan na nga ang mga sumasakay nagbayad na og P8 nga minimum nga plete sa mga PUJ drivers nga moiban g’yud og P8. Abusado kaayo ang ubay-ubay’ng mga drayber.

Sakyan nato ang ilang pangangkon nga wala sila’y 50 sentimos nga ikapanukli ug mao nga P8 g’yud ang ilang ibanon sa mga pasahero, ngano nga kun duha ang mosakay ug tunolan sila’g P20, ngano nga suklian ra man nila og P4?

Ngano’ng dili man nila suklian og P5 ang ilang managkauban ra nga pasahero? Nagpaila kini sa katikasan sa mao nga drayber ug konduktor. Mao kini ang rason nga dili angay’ng kaloy-on ang mga drayber sa PUJ kun madakpan.

Tan-awa, kagahapon diha nga gibakwi sa Citrasco ang ilang gidemanda nga usbaw sa pletehan, adunay mga drayber nga nagbagolbol kay sila mga tikasan man ug ang ilang gihuna-huna mao ra ang ilang kaugalingon nga interest.

Pila ka pasahero ang makasakay sa ilang PUJ sa tibuok adlaw nga kubrahan nila og subra nga 50 sentimos? Pila kaha ang makolekta nila nga subra sa gilatid nga pletehan?

Alang kanako, tukma lang nga dagkuon ang mga multa nga ipahamtang ngadto sa mga madakpan sa paglapas sa lagda sa tukma nga pagmaneho og sakyanan.

Ang usa ka buotan ug matinahuron nga drayber dili angay’ng mahadlok sa dagko nga multa kay dili sila madakpan kun dili lang moabuso.