EDITORYAL - Pilion g’yud ang padakpon Tinuod

Tinuod nga gipausbawan g’yud pag-ayo sa Department of Transportation and Communications (DOTC) ang kantidad sa mga multahan sa madakpan nga drayber nga makalapas sa lagda sa tukma nga pagmaneho og sakyanan.

Bisan gani ang dili pagtaod og seat belt kun mag-drive ug mosakay sa atubangan nga bahin sa sakyanan ang multa gihimo na nga P3 mil gikan sa P300 lang unta.

Ang masakpan nga mopadagan og “kolurum” nga sakyanan, kanang sakyanan nga gamiton pagpamasahero ug negosyo nga wala’y prangkisa gikan sa Land Transportation Franchising and Regulatory Board (LTFRB) dagko na kaayo’g multa, gikan sa P50 mil ngadto sa P1 milyon.

Apan madakpan kaha ang drayber kun dili lang gayud moabuso sa iyang pagmaneho? Dili ikalimod nga daghan kaayo’ng drayber nga ibaliwala ra ang mga traffic signs ug signal lights.

Bisan og dakpunon ang pagtaptap sa plate numbers, daghan gihapon nga motorista ang motuyo gayud pagtaptap og itom nga bildo sa plaka sa ilang sakyanan aron dili kini mabasa ilabi na sa gabii. Karon, P5 mil na ang multa niini.

Tungod sa pagmahal na sa multahan dili imposible nga kadtong madakpan motunol na lang og kwarta sa mga mananakop bugti sa dili pagsakmit sa ilang lisensya. Kini maoy angay’ng bantayan pag-ayo sa mga opisyal sa Land Transportation Office (LTO).

Angay’ng pilion gayud sa LTO kun kinsa ang ilang hatagan og Temporary Operators Permit (TOP) kay posible nga magkatawa niini kadto’ng mga kurakot nga mga mananakop.