Pinili ang hustisya sa pork barrel scam

Dako ang atong kalipay nga napasakaan na gayud og kasong Plunder sila si Senador Juan Ponce Enrile, Senador “Bong” Revilla Jr., Senador Jinggoy Estrada, Janet Lim-Napoles ug daghan pa tungod sa ilang kalambigitan sa pork barrel scam.

Human sila did-i sa Sandiganbayan nga makagawas sa nasud, gipaabot nga maoy mosunod ang pagpadakop kanila. Ang pagdakop kanila sigurado na tungod kay dugay ra’ng naandam sa mga polis ang ilang prisohan.

Kini’ng maong kalamboan nakapa-guwapo sa administrasyon ni Pangulong Noynoy Aquino sa tibuok kalibotan tungod kay gipakita niya ngadto kanila nga seryoso ang iyang kagamhanan sa paglutos niadto’ng mga nangawkaw sa bahandi sa nasud.

Pero nakuha-kuhaan ang kaguwapo sa administrasyong Noynoy tungod kay gipili ang gilutos sa iyang administrasyon. Ang mga kontra lamang sa iyang administrasyon ug tunok sa agianan sa iyang kandidato sa umaabot nga eleksyon unya sa 2016 ang gilutos ug ang iyang kapartido nga naapil giduphan ug gilimot-limotan lang.

Si Janet Lim-Napoles ug mga kaubang senador gilutos ni Pangulong Noynoy tungod sa piki niini’ng Non-Government Organization (NGO) nga misakiyo sa moabot og P10 Bilyones apan si Budget Secretary Butch Abad nga giingong Napoles nga maoy nagtudlo kaniya paghimo og binuang padayon nga gitagoan sa pangulo sa iyang saya.

Ang mga senador ug kongresista nga naapil sa listahan ni Napoles ug Benhur Luy nga iyang mga kaalyado wala niya paimbestigahi busa unsa may buot ipasabot niini? Dili ba gipili lang sa administrasyong Aquino ang iyang gilutos?

Mas moguwapo pa gayud unta pagmaayo ang administrasyong Aquino kun iya pang giapil paglutos, pag imbestigar ug pagtaral sa hukmanan ang iyang kapartido.