Kaibog ug kahidlaw

Kun himsog pa ang imong mga mata o panan-aw ug ang emosyon nimo, normal lang sa tawo, ma edaran man o mabatan-on, dili gayud kalikayan nga bation og kaibog ug kahidlaw. Dinhi sagad nangasaag ang mga panghunahuna nga hilabihang na impluwensyahan sa lalim nga batyagon. Nga mopahuyang sa kaligdong sa pagkabinuhat isip nga tawo. Ingon sa giugbok andam mopaulipon. Sa laing bahin, naghatag usab kini’g maayong benepisyo sa panglawas. Nagdasig kini sa kinabuhing malaumon ug masingkamuton. Ingon sa way panagana o katalaw sa pagsuong sa mga babag. Hinurot ang kaisog bahala’g biaybiayon, dili igsapayan basta makita lang ang gikaibgan nga gikahidlawan. Nga gihimong inspirasyon sa uban aron molampos sa ilang tingusbawan.

Apan usahay ang kinabuhi, daghang sungog ang di mo damhon nga moabot. Mohamag nga gakson ka sa daghang pagsulay, nga ituson o tupson ang imong dugo nga ihilak ang kapait, nga sangputanan sa tentasyon nga wa kapugong, gipatara ang kaugalingon aron ang tinguhang gipabuhagay i-anod lang sa kawad-on.  Ug nalumsan sa kasagmuyo gumikan sa bitik o lit-ag sa pagbating nahunlak.

Ang kahidlaw nahulipan sa patay nga paglaum, nga gianod sa bul-og sa hilabihan nga pagmahay. Duyog sa kapungot, nawad-an na og kaisog nga mamasin pa nga moabot ang laing higayon, nga bation pa niya kini gihapon. Busa matngoni nga di kana malingla salamat sa lawasnong katahom. Nga  sagad maoy hinungdan sa pagsalimuang sa imong paminsar nga malinawon.

Niadtong wa pa mahinayak, himoang leksyon ang uban sa ilang nahiaguman. Kun mobatyag ka na niini,  pihoa nga iseguro mo ang situwasyon nga di ka maminghoy. Ayaw padala sa igo sa imong dughan, maoy palabiha ang mando sa imong kaisipan. Di munonot sa baligho nga katarungan. Ipatunhay nga kini mohata’g kanimo’g kagawasan sa pagkab-ot sa imong gitinguha.

Apan kun ugaling masukamod ka man gihapon, luyo sa imong pagmatngon, aylag pakawala sa paglaum. Samtang may kuso’g kita, palamboa kana uban sa tabang sa kahitas-an. Kaniya itugyan ang tanang pagsalig, aron kita giyahan nga maangkon nato ang kaibog ug kahidlaw nga tugob sa tiunay nga makapalipay.