Kaligdong niluwas sa Kapitolyo

Mao ni giingon sa mga bugoy sa pikas eskina nga, “better late than later.” Uwahi na apan maayo na lang nga gikurhian na gyud ni Cebu Governor Junjun Davide ang dakong kasaypanan sa pagpakatap og armadong mga guwardiya sa pribadong ahensiya nga way kontrata sa Kapitolyo. Kinahanglan unang may drayber sa habal-habal nga maigo sa pagbuto sa shotgun sa nakatug nga guwardiya ug may guwardiya nga masakpan nga way lisensiya aron makamatngon si Davide sa iyang sipyat.

Ambot kinsay magtatambag nga nisaag ni Davide sa gahong. Wa nila kinahanglana kining bulilyaso. Maayo na lang nga gipili ni Davide ang pagtun og humble pie. Inay pagsunod sa ubang mga politiko ug manggukod sa mga nisukwahi sa ilang baruganan.

* * *

Bisan unsaon og hapnig, apiki ang pag-awhag ni Provincial General Service Officer Jone Siegfred Sepe sa Black Pearl Security Agency pagbanos sa napupos nang kontrata sa Tactical Security Agency pagbantay sa mga buhatan sa Kapitolyo sa Sugbo bisan wa pa sila hingpit nga modaog sa subasta. Gipagawas pa gyod ni Provincial Legal Officer Orvi Ortega nga niboluntaryo ang Black Pearl sa ilang serbisyo. Inay bakwion dayong sayop pila ka adlaw human sa ilegal nga pagpakatap sa mga guwardiya sugod niadtong Hunyo 1, nagpaugat silang Sepe, Ortega ug kaubanan. Pag-agas ra sa dugo kapin duha ka semana human nabisto ang anomaliya ang nakapaaghat ni Davide pagbaraw sa iyang mga sinaligan.

* * *

Aron ba kaha pagtabon sa nabisto nilang buslot, nihukom ang mga sakop sa Bids and Awards Committee (BAC) nga gipangulohan ni Ortega paglangay paghatag sa kontrata sa Black Pearl samtang gikonsulta pa nilang Government Procurement Policy Board (GPBB). Sa kasamtangan girekomendar ni Sepe nga magpadayon ang Black Pearl pagbantay sa Kapitolyo samtang paabuton ang tambag sa GPBB. Nga dakong baligho: Gidawat na nilang daan ang mga guwardiya sa pribadong ahensiya nga wa pa nila matino kun  nakapasar ba sa tanang panginahanglan sa subasta. Nidalidali pag-angkon si Sepe sa iyang sipyat sa wa pa ibasura ni Davide ang tibuok transaksiyon.

* * *

Wa mahitabo ang gipasidaan ni Sepe nga kaguliyang kun papahawaon ang mga guwardiya sa Black Pearl. Hapsay ang pagbanos sa mga polis ug mga sakop sa Civil Security Unit (CSU). Mas  gawasnon na si Davide nga mosubli nganong nilikoy ang subasta. Kay tanang timailhan nagpakita og depekto sa iyang sistema sa pagduma sa Kapitolyo. Duha ang posibleng katin-awan nganong nalutsan siya: Una, nga banga pa sa tadyaw ang iyang mga magtatambag, nga hinaot mao ray iyang problema ug dili ang; ikaduha, nga may gipaboran ang iyang mga sinaligan, maong nagpaugat sila pagsuway paglipat sa gobernador ug nilampos ra ba gyod sa 14 ka adlaw hangtod nga nangisog si Davide pagpatigbabaw sa kaligdong.

* *  *

[email protected]