Kamatayon alang sa tigpayuhot og drugas

Daghan na nga polis ang gipatay sa mga nagpayuhot og ginadili’ng drugas. Ang labing ulahi niini mao si Chief Inspector George Caña, ang hepe sa kapolisan sa lungsod sa Ubay, Bohol, nga gibanhigan ug gipatay sa giingong sindikato sa mga tigpayuhot og ilegal nga drugas sa Bohol.

Si Chief Inspector Caña gitiwasan sa mga mibanhig kaniya aron pagseguro nga mamatay gayud siya. Ang subo sa iyang kamatayon kay kanhi polis nga si PO1 Owen Rosales ang gipasanginlan nga maoy nangulo sa sindikato nga maoy namanhig.

Hinuon, sa hot pursuit operation sa kapolisan, napatay usab nila si Rosales nga nadistino kaniadto sa Guindulman (Bohol) Police Station apan gitangtang sa serbisyo tungod sa pagpalta sa trabaho nga walay pagtugot.

Napatay usab sa kapolisan ang laing lima pa ka kauban ni Rosales atol sa pinusilay didto sa usa ka beach resort sa Barangay Puerto San Pedro sa lungsod sa Bien-Unido human sila misukol sa mga polis.

Gawas sa mga nangamatay nasikop usab sila si Paulo Avenido, Robert Olalo, Orlando Garcia ug ang usa ka minor de-edad human sila mitahan sa ilang kaugalingon sa mga polis.

Si Paulo Avenido anak sa ilado ug respitado’ng pamilya sa lungsod sa Bien-Unido. Anak siya ni Pat Avenido, usa ka Colonel sa militar kaniadto ug konsehal karon sa ilang lungsod.

Sigun sa kapolisan sa Bohol, gipatay si Chief Inspector Caña tungod sa iyang hugot nga kampanya batok sa mga nagpayuhot og ginadili’ng drugas sa lungsod sa Ubay.

Sigun sa atong nakita ug sa motibo sa krimen makaingon kita nga ang sindikato sa ginadili’ng drugas wala na g’yuy pagtahod sa balaod ug wala na mahadlok sa gobiyerno ug gani ingon sa ang gobiyerno pa ang gihadlok nila. Busa angayan ug matarong lang gayud nga tugbangan usab sila og silot nga kamatayon.