Shabu, masiao ug video karera

Karong isyoha, akong hatagan og pagtagad ang mga nadawat nako nga text messages, ilabi na kadto’ng mga report sa illegal nga binuhatan.

Taga Sitio Caduloy sa Barangay Tisa may mireport nako kabahin sa nagkagrabe nga problema sa illegal nga drugas ug illegal nga sugal sa ilang dapit.

Nag-report kini nga ang uban nga mga nangadakpan kaniadto nakabuhi na gikan sa bilanggoan ug mibalik na usab sa negosyo. Matud pa nga daghan ‘sab ang nag-operate og video karera sa ila.

Gitug-an niya nga tulo ka video karera ang gi-operate niini’ng usa ka George. Dili lang usa nako itug-an ang apilyedo apan matud sa informer nga ilado kaayo kini sa ilang dapit. Gawas ni George, duna pa kuno’y uban nga balay nga adunay video karera apan kuhaon pa niya ang mga ngalan. Gawas niini, kinawatay sa kuryente misiaw ‘sab kuno sa ilang lugar ug kuyaw sa sunog.

Ang namaligya og shabu anaa kuno kini sa gitawag og Riverside sa Sitio Caduloy. Unsaon gud, kini’ng PDEA nagmika ra man. Maayo lang modawat og sweldo.

* * *

Laing report mao ang pagkusog na ‘sab kaayo sa masiao didto sa Medellin nga giingon’g gi-operate sa usa ka “Rene.” Dili ni ako ha?

Ang report mao nga ang grupo nag-abang og balay sa usa ka Leding sa Barangay Lamintak Sur. Anha sila magtali sa masiao. Siyaro og wala masayod ang kapolisan niini? Nagpa-patay mali ra mo no?

Ang akong inpormer miingon nga ang kapolisan sa Medellin wala mohimo og aksyon niini kay amigo man nila ang financier sa masiao. Hala, awhagon nako ang ubang unit sa kapolisan nga maoy mo-operate.

* * *

Sa eskena Eversley Hospital, daghan lagi kuno nga mga drayber og habal-habal mga batan-on nga wala’y lisensya. Ang akong ikasulti niini mao nga ang atong kapolisan gud diha utro pa man nga nagmika.

Wala malilong sa kapolisan nga ang pagmaneho og sakyanan nga wala’y lisensya gidili sa balaod, apan diha man gani’y higayon nga polis sa Consolacion nasakpan sa LTO operatives nga nag-drive og motor nga wala ‘say lisensya.  Salikwaot lagi kaayo kun sila manakop nga ang uban kanila malapason usab sa balaod nga gitahas kanila nga ipatuman. Wala g’yud kita’y mahimo niini kay ang LTO ‘sab wala na mohimo’g pagpanakop.