Kahasol sa pagtak-om
Kadako sa kahasol nga namugna sa pagpakahilom sa mga sakop sa Board of Trustees sa Cebu Puericulture and Maternity House labot sa pasangil nga gitaptapan sa ilang nurse og tape ang baba sa bata nga pasyente sud sa ilang nursery:
Gawas nga nahinayak pagpanghimakak sa insidente ang ilang abogado ug medical directress namasangil pa gyod sa mga ginikanan nga maoy nitaptap og tape sa baba sa ilang anak;
Nahago ang nagkalainlaing buhatan sa gobyerno paghimo og hiniusang imbestigasyon sa insidente; ug
Madugangan ang baga nang daan nga lut-od sa mga kaso sa hukmanan karong nakakuha nang mga ginikanan og abogada ug nakahukom na pagkiha sa tambalanan.
* * *
Kun nitingog pa lang dayon ang mga sakop sa board, nga maoy labaw’ng mga tagduma sa 92 ka tuig nang institusyon sa Sugbo, nalikayan unta ang wa kinahanglana nga pagkausik sa panahon sa tanang hingtungdan:
Makatingob untang mga ginikanan pag-atiman sa mao-pa-lang-gani-pagkatawo-nataptapan-dayon-ang-baba nilang bata inay nga motambong sa mga husay sa interagency task force ug manubag sa mga pangutana sa media;
Makabuylo untang tambalanan pagpalambo sa ilang pangalagad sa mga pasyente ug pagtino nga di na masubli ang kalapasan;
Makatuman untang mga buhatan sa gobyerno sa mas mahinungdanon ug mas dinalian nilang mga gimbuhaton; ug makatingob untang media pagsubay sa tinuod nga mga balita sa kapakyas pagtagbaw sa batakang mga panginahanglan ug pagkawat sa buhis sa katawhan.
* * *
Uwahi nang pagtingog sa board. Maong natabonan ang kamakahuloganon sa opisyal nilang pamahayag labot sa kontrobersiya. Nipadayag sila og kasubo sa panghitabo. Giapil pa gani ang ikaduhang bata kansang hulagway nga gitaptapan og tape ug pacifier namantala na sab sa Facebook. (Ang mga pangangkon sa ikatulo ug ikaupat nga kaso nahimo pila ka takna human naluwati ang pamahayag.)
Kun wa kang kabantay, gisukwahi sa board ang nahaunang panghimakak ug pasangil nilang Atty. Cornelio Mercado ug Dr. Raida Varona. Nagpasabot ba ni nga wa mananghid sa board silang Mercado ug Varona? Nakaamgo bang board nga aron katuohan ang sukwahi nilang pamahayag kinahanglan nilang isalikway ang duha?
* * *
Kun giangkon pa lang dayon sa board ang responsibilidad sa panghitabo ug kun nangayo pa lang dayon og pasaylo sa mga biktima, di unta mapugos sa pagkiha silang Ryan Noval ug Jasmine Badocdoc, di unta mahagit sa paggawas ang inahan sa ikaduhang bata ug di unta maaghat pagtumaw ang mga ginikanan sa ikatulo ug ikaupat nga bata. Kun mapasaka nang kaso, mahimong mobalik pagtak-om ang mga sakop sa board. Hinaot naleksiyon na sila nga ang pagpadayon pagpasalipod sa teknikalidad, hinikalimtan ang ilang obligasyon pagsusi ug pagbutyag unsay tinuod nga nahitabo sa tambalanan, di makaayo sa tanang hingtungdan. Di lang sa mga biktima. Kun dili hasta sa kaligdong sa institusyon.
- Latest
