Hinaot nga matubag na

Daghang anggulo sa kontrobersyal nga pagpapilit og tape sa baba sa usa ka masuso nga kinahanglan nga tubagon aron mismo ang publiko nga nagsunod ning maong kontrobersiya, mahatagan og katin-awan.

Ang mga lakang sama sa pagbutang sa hulagway diha sa social networking site, usa ka butang nga nagkinahanglan og igong panahon aron matubag ang isyu. Inay idangop sa hingtungdan nga ahensya sama sa kapolisan o mismo sa tambalanan, mas gipili sa mga ginikanan sa bata nga bag-ong natawo ang pangdangop ug pagpalaban sa social media. Unsay tumong sa mga ginikanan?

Kung ginikanan ang hisgutan, daghan ang nag-ingon nga imposible sa usa ka ginikanan nga paatan niya og tape ang baba sa masuso nga anak. Sa di’ pa ‘ta mohatag sa atong obserbasyon kabahin ning maong anggulo, angayan natong dawaton ang kamatuoran nga nahitabo karon sa atong palibot. Adunay amahan nga gipatay ang kaugalingong anak kansang dagway iya pang gibutang sa facebook.

Sa miaging duha ka semana adunay inahan nga mipakuha sa iyang anak kansang fetus o puya gilabay lang sa kasagbutan. Sa miaging mga buwan, lab-as pa sa atong huna-huna ang mga ginikanan nga nibugaw sa ilang mga anak sa internet o cybersex. Sa panahon karon, makasiguro ka ba sa maayong intensyon sa usa ka ginikanan ngadto sa ilang mga anak?

Sa panahon karon, dakong sala ba gud nga magduda ka sa unsa ang papel sa mga ginikanan ning kontrobersiya sa Cebu Puericulture and Maternity House. Alang sa mga sakop sa inter-agency task force nga nag-imbestigar ning maong kontrobersiya, di’ maayong ilihay sa maong isyu ang mga ginikanan. Wa’ magpasabot nga giisip nato silang sad-an ning maong isyu. Kinsa ba gyud bitaw ang ginikanan nga makaako sa pagsap-ong og tape sa baba sa iyang kaugalingon  nga anak?

Apan sa pikas nga bahin, kinsa ba ‘sab gyud nga ginikanan ang di’ makahimo sa ingon? Kinahanglan susihon unsay kahimtang sa pinansyal nga  aspeto sa mga ginikanan sa wa’ pa ni motumaw nga problema ug unsang matang sila nga mga tawo? Sama ra nga susihon ug tubagon ang atong mga pangutana sa tulo ka nurse ug usa ka midwife nga nalambigit sa isyu. Sa pipila ka tuig sa ilang pangatungdanan, aduna ba sila’y kasaypanan nga nahimo sa ilang trabaho?

Nalambigit ba sila og bulilyaso sa ilang trabahoan? Ug kung ikaw ang nurse nga maoy giduot sa mga ginikanan nga nagbutang sa tape sa baba sa bata, unsang matang sa kaisog ug katig-a sa kasing-kasing aduna ka nga nahibawo kang daan nga matag adlaw anaa ang mga ginikanan sa bata nag-monitor sa kondisyon sa ilang anak? Unsay nasu’d sa imong huna-huna nganong imong nabutang ang tape? Ug kung inosente man gani ka sa pasangil, unsay imong gibati karon nga ikaw ang naduot ning maong isyu?

Unsay mga lakang nga imong himuon aron sa paglimpyo sa imong pangan? Kini na siguro ang labing dakong kontrobersiya nga nasugatan sa maong tambalanan sukad sa iyang katukoran. Ug kung ikaw ang institusyon kansang mga tawo gipasanginlan ug gihusgahan nga nibuhat niini, unsay naa sa maong mga medical practitioner nganong imo silang gipanalipdan?

Unsay gihuptan sa tulo ka  nurse ug usa ka midwife nganong isog kang nibarug isip tambalanan alang niining tawhana? Tungod ba kay mas nituo ka sa ilang bersyon sa sugilanon itandi sa pangangkon ug pasangil sa mga ginikanan sa bata?

Kung ikaw maoy tagdumala sa tambalanan, sayon ra gyud unta kaayong ipangayo og pasaylo tunga-tunga ning isyu nga inyong nasugatan. Apan nganong nagdumili man ka sa pagbuhat niini? Tungod ba kay wa’y lami ang pagpangayo og pasaylo kung sa kina-iladman nahibawo kang inosente ka sa maong pasangil?

Kung ikaw ang tawo nga nagsunod ning maong kontrobersiya, di’ ba ma’s maayong susihon usa nimo unsa gyud ang tinuod nga nahitabo? Hagit ning maong kontrobersiya sa atong pagkahamtong sa pagsusi ug pagtimbang sa isyu inay mo-diretso  ‘ta sa paghatag sa atong mga opinyon ug paghusga sa mga tawo nga nalambigit ini.

Hangtud nga di’ matubag ang daghang mga pangutana, magpabilin kung magduda sa tanang mga tawo nga nalakip ning maong kontrobersiya.

Email: [email protected] or [email protected]