Wala ba’y katungod mag-usab ang AFP?

Gisaway sa usa ka progresibo nga grupo ang Armed Forces of the Philippines (AFP) tungod sa pagsalmot niini sa tinuig nga Brigada Eskwela o Balik Eskwela nga ang tumong aron maandam na’ng daan ang mga tunghaan sa nasud alang sa pagbukas sa klase.

Gidudahan ang AFP nga nagpahumot o kaha nag-promote lang nga maayo sila og imahe ngadto sa publiko apan diay kuno malapason kini sa mga tawhanong katungod ug daghan pa nga gihulagway nga dili maayo’ng binuhatan.

Ang mga militante’ng pundok mipasangil nga Human Rights violators ang militar, mangatake og mga eskuwelahan, mibansay sa mga estudyante isip ‘child soldiers’ ug mopatay usab og mga tinun-an.

Apan dili ba mas maayo hinuon kini’ng gibuhat karon sa AFP nga usbon ang ilang kasaypanan sa nanglabay’ng mga dekada? Kun ang mga rebel returnees gani nag-usab, ang AFP ato ba diay’ng did-an?

Kinsa man ang mi-rekrut og mga bata’ng rebelde, ang AFP?  Kinsa man diay kana’ng mga  grupo nga usahay anha manago sa mga eskuwelahan, ang AFP?  Kinsa man diay kana’ng mang-rekrut sa mga tinun-an aron manguyog sa mga rally ug mag-alsa batok sa gobiyerno, ang AFP?

Wala’y duda, ang gihimo sa AFP karon kabahin sa counter-insurgency kay naleksyon naman sila nga ang paggamit og armas nakapasamot sa rebelyon, kay sama ra nga gipaypayan ang baga ug nahimo na hinuon nga  kayo.

Apan pinaagi sa “Oplan Bayanihan” giayo sa AFP ang gipangguba nila kaniadto, gitabangan ang gobiyerno nga makatukod og mga inprastraktura alang sa katawhan.

Pinaagi niini hinay-hinay nga nabuntog sa AFP ang insurhensiya. Nabalik ang pagsalig sa katawhan ngadto sa militar.

SSS bati moserbisyo

Kun imo nga estudyohan ang serbisyo sa nagkalainlaing ahensya sa gobiyerno, imong masud-ong nga adunay hinay ug aduna usa’y paspas moserbisyo sa publiko.

Usa sa luya ug hinay kaayo nga ahensya mao ang Social Security System (SSS). Kada adlaw wala’y paghubas ang mga tawo nga anaa sa sulod sa opisina niini sa Osmeña Boulevard, magpaabot nga matagad. Usa sa batasan sa mga kawani sa SSS mao nga kun mokunsulta ka sa imong problema, sil-ingon dayon nila ang imong papeles, dayon moingon, "balika ni sir tulo ka semana o usa ka buwan gikan karon." Inigbalik nimo, wala pa diay nila kini makompleto ug moingon na usab ang kawani pabalikon na usab paglapas sa laing usa ka buwan.

Sa ikaduha’ng pagbalik, wala pa gihapon nila makompleto ang gikinahanglan nga papeles ug moingon na usab "pagbilin na lang og contact number nimo sir.”

Ingon niini ang serbisyo niining SSS dinhi sa Sugbo. Lahi kaayo sila sa GSIS nga kun unsay imong problema, pahuwaton ka lang og 10 minutos, dayon itunol kanimo ang hustong tubag sa imong problema.

Nganong ingon man niini ang serbisyo sa SSS?  Kuwang mo og kawani? Ngano nga dili man kamo mo-hire og mga job order? Please, ayaw ninyo paugtasa ang tawo nga nagbayad sa inyong suweldo.

* * *

Gitun-an pag-ayo sa Department of Justice (DOJ) ang hangyo ni Janet Lim-Napoles isip bugti sa iya’ng paghatag sa listahan sa ngalan sa mga opisyal sa gobiyerno nga mibulsa og dako’ng kabahin sa ilang Priority Development Assistance Funds (PDAF), ug sa Malampaya funds.

Una, ang iyang immunity. Ikaduha, mao nga himuon siya nga state witness ug ang ikatulo, mao nga dili lang pasilotan ang iyang mga anak. Si Napoles ang utok sa pangawat, unya angay ba nga uyonan ang iyang hangyo?

* * *

Bahin sa hangyo nga dili lang pasilotan ang iyang mga anak nga sila si Jo Christine ug Jeane. Nasuta gikan ni whistle blower Benhur Luy nga si Jo Christine ang gisaligan sa iyang inahan paghipos sa minilyon ka pesos gikan sa Malampaya funds, kay siya ang nagdumala sa mini nga NGO nga adto mosulod ang kuwarta gikan sa Malampaya.

Si Jeane, gikasohan sa pagka-tax evader kay nakapanag-iya og usa ka mahalon kaayo’ng condominium didto sa Los Angeles, California bisan og wala siya’y klaro nga trabaho o kinitaan. Unya dili sila pasilotan?

* * *

(wencelen@yahoo,com)