EDITORYAL - Kinsa man gyud diay nagbutang sa plaster?

Nailhan na gayud sa publiko ang nurse on duty sa dihang nakita sa inahan sa masuso nga gi-plasteran ang baba sa iyang anak didto sa Cebu Puericulture Center and Maternity House. Apan sama sa pamahayag sa abogado sa maong ospital, ang nurse miingon nga dili siya ang nag-plaster sa baba sa masuso ug wala siya nakahibalo og kinsa ang nag-plaster o asa gikan ang plaster.

Kun ang reaksyon sa mga tawo sa social media sites sama sa Facebook ang basehan, mahimo nang kataw-anan kining situwasyona. Adunay miingon nga ang masuso ang mi-plaster sa iyang kaugalingong baba. Duna pu'y uban nga miingon nga laing masuso ang mibutang sa plaster kay gisabaan sa bata nga nagsige og hilak.  Ang uban miingon nga dili ingon nato ang mibutang sa plaster. Mas kataw-anan pa gayud ang miingon nga ang plaster adunay magic ug mitapot lang kini sa baba sa masuso.

Bugal-bugal na tuod ning mga reaksyon sa social media apan dili sad nato mabasol ang mga tawo nga miingon niini tungod kay siguro, na-frustrated na sila sa dagan sa imbestigasyon nga gihimo sa Department of Health.

Mao kini ang mga detalye nga atong nahibaw-an: 1) Mireklamo ang mga ginikanan nga gi-plasteran ang baba sa ilang anak; 2) Milimod ang nurse on duty adtong higayona nga siya ang nagbutang sa plaster.

Kinsa man diay ang nagbutang sa plaster? Kay ang nursery sa ospital dili man basta-basta masudlan og laing tawo? basin tuod og magic.