Nindot ang pagkoral

Husto kaayo ang gihimo sa kagamhanan sa dakbayan sa Sugbo nga gikoral og taas kaayo nga sin ang daplin sa Imus Road diin ang mga nasunogan sa Barangay Lorega-San Miguel padayon nga mitukod sa ilang panimalay.

Una nga rason mao ang “beautification.” Ikaduha, “security sa mga bata” ug ang ikatulo mao nga mapugngan kadto’ng abuso niadto’ng mga tawo nga bentahoso kaayo nga paabton ang ilang balay sa aseras ug maglisod na ang mga maglakaw.

Saludo ko ni Acting City Engineer Jose Marie Poblete ug sa uban nga nakahuna-huna niini nga proyekto ug gipatuman sa kagamhanan sa dakbayan.

Una ko nga nakabantay niini kay anaa ko sa Imus Road mag-agian mata’g adlaw. Haom kaayo ang Green nga kolor sa mga sin kay ang mga kahoy nagsugod na usab sa pagpang-dahon.  Pasagdi na lang kun gituyo g’yud sa administrasyon ni Mayor Michael Rama nga green ang kolor sa koral kay mao may kolor nga gisagop sa ilang grupo. Nindot man ‘sab ang green tan-awon.

Kun dili gud butangan og koral, sigurado ---- paputol ko’s liog – og dili ba moabuso ang mga nagpuyo daplin sa karsada nga ipalapad nila ang ilang balay ngadto sa aseras.

* * *

Nahukman g’yud sa kadagkoan sa CESET kon City Environmental Sanitation Enforcement Team nga ikiha na lang ang mga opisyal sa Cebu City Health Department kay wala gayud sila magtarong paghipos sa ilang basura.

Gitug-anan ko ni Grace Luardo nga hangtod karon aduna gihapo’y mga basura sa City Health Department nga dili “segregated” kon gibuwag ang mga madugta ug ang dili madugta. Na hala, awhagon nako ang CESET nga dalion ang pagpasaka og kaso. Kun moingon gani kita nga pasakaan og kaso kini nagpasabot nga tua na giduso sa City Prosecutor’s Office o kaha sa hukmanan.

Kun anaa pa gani sa City Legal Office, maisip pa kana nga kabahin sa “processing of the complaint” kon pag-andam sa kaso batok sa mga nakahimo’g salaod.

Dili man gud ko gusto nga kutob ra sa report nga ipangkiha ang naisyohan og Citation Tickets apan wala g’yud. Giingnan ko ni Grace Luardo nga dugay kaayo mo-notaryo ang mga abogado sa City Legal Office sa ilang affidavits.

Ngano man na? Ayaw ko’g ingna nga dugay-dugayon abi kay walay bayad? Pag-syur mo diha ha? Alang ni Grace Luardo, himoi kanunay og follow-up. Kun problema g’yud na, i-report ngadto sa mayor.