Husto ang pagduda’ng Carillo

Kadudahan g’yud tinuod kun ngano nga ang kapolisan nagpabilin man nga pakyas pagdakop sa mga wanted nga “drug lords” ug “gambling lords” nga ang uban kanila matud pa kanunay man nga anaa sa mga buwangan.

Gisukna ni Konsehal Gerardo Carillo si Cebu City Police direktor Noli Romana kay kanunay siya nga makadawat og inpormasyon nga ang uban’g ilado kaayo nga wanted dali ra kaayo unta dakpon kun tinguhaon g’yud sa kapolisan.

Gitug-anan ko’ng Carillo nga ang iyang igsuon anaa kanunay sa buwangan ug maoy mipahibalo kaniya nga iya man makit-an pirmi ang mga tawo nga wanted. Nasulod tingali sa laang ni Carillo, si Romana napugos sa pag-ingon nga dili imposible nga adunay mga polis nga nagproteher sa mga drug lords ug gambling lords.

Kinahanglan nga si Sir Romana mohingusog gayud sa pagpalihok sa iyang mga hepe sa kapolisan aron mohimo’g hugtanay nga kampanya sa mibalik na pagkuyanap nga ilegal nga sugal. Sa ilegal nga drugas, ang Philippine Drug Enforcement Agency (PDEA) ang atong rombohon niini.

Utro pa ra ba kini’ng PDEA nga wala g’yuy ayo. Pulos lang g’yud ginagmay ang ilang makuha. Kun imo’ng kwentahon ang gasto sa kagamhanan pagmugna niini’ng PDEA, alkanse kaayo kay walay maayo nga kalamposan.

Wala gayud sila makakuha og mga dinaghan nga shabu. May makuha man tuod mga second level pushers lang. Dili sama sa kalampusan kaniadto sa Presidential Anti-Organized Crime Task Force (PAOCTF) nga nakakuha og mga tulo ka kilo’ng shabu gikan lang sa usa ka dinakpan.

* * *

Sama gud sa kampanya sa ilegal nga sugal. Bisan og mikuyanap na pagbalik ang masiao ug video karera ang kapolisan wala lang g’yud maglihok.

Diha’y higayon nga nakasakmit ang kapolisan og 10 ka video karera ug moli-moli sa Barangay Pasil, apan mihunong man. Ang mga mata sa katawhan anaa karon nagtutok ni Kernel Romana kay nabaniog man nga diha’ng didto pa siya madistino sa Negros Oriental isip provincial direktor wala man usab siya’y maayo nga agi sa kampanya sa sugal.

Gani na-report pa nga duha sa iyang bodyguards ang nasakpan nga midawat og suborno sa mga gambling lords.

Sa ako na nga giingon, nga kun palpak man si Kernel Romana sa iyang pagdumala sa kapolisan sa dakbayan, apil nga mabasol si Mayor Michael Rama nga maoy nangusog nga si Romana maoy iyang himoong hepe.