Wild animals sa Zoo gimaltrato?

CEBU, Philippines - Ang pagtangkal og kahayopan nga dili sila makalihok pag-ayo didto sa sulod maisip g’yud tinuod nga pagdagmal sa mga wild animals.

Kadtong mga tawo nga mahigugmaon kaayo moatiman og mga mananap, kinahanglan nga dili sila anugonan nga mogasto og kwarta pagpahimo og dako nga tangkal sa ilang binuhi.

Ang mga unggoy pananglit kinahanglan nga buhatan og dako kaayo nga tangkal nga anaa sa sulod ang pipila ka punoan sa kahoy nga mobunga aron anha sila makakabyon-kabyon.

Kun mobunga na ang mga prutas sama sa bayabas, malingaw ang mga unggoy sa pagpanguha aron kan-on ang mga bunga.

Ang mga langgam usab makahimo sa paglupad-lupad ug motugdon sila sa mga sanga sa kahoy nga anaa sulod sa dako’ng halwa. Susama ra nga wala sila pangdakpa.

Ang grupo People for the Ethical Treatment of Animals (PETA)-Asia nahingawa pag-ayo sa kahimtang sa mga gialimahan nga mananap diha sa Cebu City Zoo.

Ilang natan-aw nga daghan sa mga wild animals gibutang og halwa nga hapit gani sila maglisud pagtuyok-tuyok. Apan si Giovanni Romarate nga maoy nagdumala sa zoo mipasabot nga gituyo nila ang pagbutang sa pipila ka mananap sa gagmay nga tangkal aron sayon ra sila nga matambalan kay mga masakiton. Bisan pa sa pangatarongan ni Romarate makita gihapon nga ang City Zoo kuwang g’yud og kahimanan nga kabutangan sa mga mananap ug nanginahanglan kini nga atimanon dayon.