Talisay Flying Squad

Ang usa ka buotan nga tigpatuman sa balaod angay gayud nga maoy una’ng motuman sa mga lagda nga gusto niya nga ipatuman aron makakuha siya og respeto gikan sa katawhan. Ang respeto sa usa ka tawo dili mahimong mapalit kun dili makuha kini kun ang tawo magtinarong sa iyang katungdanan ug motuman sa tanang lagda nga gusto niya nga ipasunod. Hisgotan nako ang kabahin sa grupo nga nagpatawag og Flying Squad, mga kunohay traffic enforcer nga direkta’ng ubos sa pagdumala ni Talisay City Mayor Johny De Los Reyes. Ang mga sakop niini’ng mao nga grupo sa kunohay traffic enforcers gipagamit og itom nga sakyanan nga adunay blinkers ug siren. Ang una nako nga pangutana, nag-agi ba og seminar ang mga sakop niini’ng mao nga grupo? Tingali, nakaagi g’yud sila og seminar, apan ambot og naminaw ba kaha sila pag-ayo. Kun naminaw pa sila, dili unta sila moabuso aron wala’y makasaway kanila.

Una nga pangutana. Ngano nga ang sakyanan nga ilang gigamit wala ma’y plate number ang luyo? Aduna ko’y hulagway niini ug ipublikar nako ugma dinhi sa Banat News.

Ika-duha, ang mao nga grupo sa kunohay traffic enforcers sa Talisay, miadto sa opisina sa Land Transportation Office (LTO)-7 sa Natalio Bacalso Avenue kaniadtong Lunes sa hapon, ug ang ilang sakyanan gi-parking ra daplin sa karsada atubangan sa Cebu South Bus Terminal.

Tungod sa dapit nga didto gi-parking ang ilang sakyanan anaa ang “No Stopping Anytime” nga traffic sign, apan wala nila gitahod. Ingon ba niini ang batasan sa traffic enforcers sa Talisay? Angay tingali nga mauwaw si Mayor De Los Reyes sa gihimo sa imong “Flying Squad” kay tigpatuman man kaha sila sa balaod, unya sila ra usab diay ang dili motuman?

Bisan ang mga traffic enforcers wala tugoti nga molapas sa balaod. Ngano’ng “Flying Squad” man ang gibunyag niini nga grupo? Aw mao tingali nga gibunyagan kini niini’ng mao nga ngalan kay kaniadtong Miyerkules sa hapon, didto kini mangatang unahan sa taytayan sa Bulacao mga alas dos sa hapon. Pagka alas kwatro, wala na sila didto sa Bulacao, Talisay kay didto na usab ang ilang sakyanan nag-standby sa highway tunga-tunga’ng bahin sa Bulacao ug Pardo. Ang mao nga dapit dili na sakop sa ilang teritoryo.

Wala nako sila panid-i, nataymingan lang. Ambot, unsa kaha’y nasulod sa utok ni Mayor JVR nga naa na man unta’y traffic enforcer ang Talisay nga gitawag og City of Talisay-Traffic Operation Development Authority (CT-TODA), apan nagtukod pa man g’yud siya’g iya.

Unsa, wala kay salig sa CT-TODA abi kay ang bise mayor ang nagdumala?